Syn saǵaty: jańa múmkindik

Elbasynyń 5-shi shaqy­ry­lymdaǵy Qazaqstan Parlamenti Májilisin taratý jáne Qazaq­stan Parlamenti Májilisi depýtat­tary­nyń kezekten tys saılaýyn ótkizý týraly Jarlyqqa qol qoıýyna baılanysty qoǵam qaıratkerleri men iri úkimettik emes uıymdar ókilderi óz pikirlerin bildirýde. Keshe Qazaqstan Prezıdenti janyndaǵy Ortalyq kommýnıkasııalar qyzmetinde ótken brıfıng te osy máselege arnaldy. Qazaqstan Kásipodaqtary federa­sııa­synyń tóraǵasy Ábilǵazy Qusaıynov óz sózin bylaı bastady: «Árıne, búginde buqaralyq aqparat quraldarynan elimizdegi bolyp jatqan jaǵdaılardy kórip, bilip, estip jatyrmyz. Kóptegen ózgerister bolýda. Eger búkil álem turǵysynan qarastyrsaq, daǵdarys keńinen beleń alyp barady. Árbir elde, árbir otbasynda kúrdeli másele az emes. Onyń sebebin shıkizattyń, onyń ishinde munaıdyń baǵasynyń túsýimen de baılanystyrýǵa bolady. Mundaı kúrdeli kezeń bizdiń elimizde buryn da ótken. Eger, esterińizde bolsa, elimiz 90-shy jyldary úlken daǵdarysty bastan keshti. Táýelsizdik alǵannan keıin bizdiń elimiz 10 jyldaı sol daǵdarysty eńserip, jańa reformalar negizinde óz eńsesin tiktegen edi. Odan keıingi 2009, 2011 jyldarda bolǵan daǵdarystar da belgili. Al qazirgi ekonomıkalyq daǵdarystyń jóni tipten bólek. Buǵan qosa, keıbir memleketterde oryn alyp jatqan saıası jaǵdaılardan da habardarsyzdar. Ol da jaqsylyq ákelip jatqan joq. Burynǵy qalyptasqan qarym-qatynastar buzylyp, aınalamyz ózgeriske ushyraı bastady». Osylaı degen ol Elbasynyń 5-shi shaqyrylymdaǵy Parlament Májilisin taratý týraly Jarlyqqa qol qoıýyn, sondaı-aq, Parlament Májilisi depýtattarynyń kezekten tys saılaýyn taǵaıyndaýǵa baılanysty halyqqa úndeýin quramynda 2,2 mln. múshesi bar Kásipodaqtar federasııasy tolyqtaı qoldaıtynyn jetkizdi. «Bir aptanyń ishinde bir-birimizben pikir almasyp, sóılestik. Birinshiden, bir jyldyń ishinde 2 saılaý ótkizý durys emes. Sebebi, daǵdarys kezeńinde qanshama qarajat ketedi. Ekinshiden, saılaýdy daıyndaý úshin úlken jumystar júrgiziledi. Qanshama saılaý ýachskeleri ashylýy qajet. Al osyndaı qıyn-qystaý kezeńde biz ózimizdiń bar kúsh-jigerimizdi eldi damytý jolyndaǵy jumystarǵa baǵyttaýymyz kerek. Ol úshin árbir teńgeni tıimdi jumsaǵanymyz jón. Sondyqtan, bul – úlken másele. Ony Elbasy jan-jaqty aıtyp berdi»,– dedi óziniń sózinde Á. Qusaıynov. Sondaı-aq, Kásipodaqtar federa­sııa­synyń tóraǵasy búgingi ahýaldy eskere otyryp, Májiliske ár salanyń saýatty ári elimizdiń múddesine tolyǵymen berilgen kandıdattar kelýi kerek ekenin, ol úshin myqty zańgerler men ekonomısterdi, ıaǵnı kreatıvti oılaı alatyn azamattardy jańa Májiliske saılaý qajettigin, bul jergilikti jerlerdiń de jumystaryn jandandyrýǵa múmkindik beretinin atap ótti. «Sondyqtan saıası partııalar fraksııalary qazirgi jaǵdaıdy túsine otyryp, óte durys bastama kóterdi. Jalpy, Parlament Májilisin taratý týraly sheshimge qazirgi jaǵdaıdy tereńnen saralaý arqyly kelip otyrmyz. Al elimizde qolǵa alynyp jatqan reformalar memlekettiń daǵdarysty eńserýine sep bolady dep oılaımyz», – dedi Á. Qusaıynov. Qazaqstandaǵy bilim jáne ǵylym qyzmetkerleriniń salalyq kásipodaǵynyń tóraıymy Maıra Amantaeva da bul saılaýdyń ótkizilýin quptaıtynyn aıtty. «Búginde 7,5 myńnan astam mektepte 300 myńnan astam muǵalim jumys isteıdi, buǵan qosa, bizde 11 myńnan astam bastaýysh kásipodaq uıymy bar. Dúnıejúzinde bolyp jatqan daǵdarysqa qaramastan, memleketimiz bilim salasynda júrgen qyzmetkerlerdiń eńbekaqysyn 29 paıyzǵa, densaýlyq saqtaý salasy qyzmetkerleriniń jalaqysyn 28 paıyzǵa kóterdi, sondaı-aq, áleýmettik salaǵa da aıryqsha kóńil bólinýde. Bilim salasynda kóptegen ózgerister men reformalar júrgizilip jatyr. Solardyń biri – jastarǵa tegin kásiptik-tehnıkalyq bilim berý. Biz aldaǵy ýaqytta osy reformalardyń nátıjeli júzege asýyn qalaımyz, oǵan bilim-ǵylym salasynyń mamandary kúsh sala berýi kerek», – dedi M. Amantaeva. «Qazprofmetall» taý-metallýrgııalyq salalyq kásipodaǵynyń tóraǵasy Asylbek Nuralın óz sózinde: «Jalpy, bul saıası partııalarǵa úlken múmkindik beredi. Sebebi, biz álemdik daǵdarys salqynyn tıgizip otyrǵan kezeńnen shyǵýymyz kerek. Sol úshin Parlamentte jańa zańdar qabyldanǵany jón. Jańadan jasaqtalǵan Parlament depýtattary aldaǵy ýaqytta soǵan yqpal etedi degen úmitimiz bar», – deı kele, Parlamenttiń 5-shi shaqyrylymyndaǵy depýtattar da kóp zańnyń, máselen, «Eńbek týraly» Kodekstiń, «Kásipodaqtar týraly» Zańnyń qabyldanýyna yqpal etkenin jetkizdi. Sonymen qatar, ol 20 naýryzda ótetin saıası naýqanǵa taý-ken metallýrgııa­sy salasynyń jumysshylary atsalysatynyn jetkizdi. «Jańa Parlament eldiń ındýstrııalyq-ınnovasııalyq damýyna, ekonomıkaǵa ınvestısııa tartýǵa sep bolatyn zańdardyń qabyldanyp, olardyń júzege asýyna yqpal etedi dep oılaımyz. Sondyqtan, bul – saıası partııalar úshin óz múmkindikterin kórsetýde jaqsy kezeń bolyp tur», – dedi A. Nuralın. Hımııa, munaı-hımııa jáne osy tektes ónerkásip qyzmetkerleriniń salalyq kásipodaǵynyń tóraǵasy Kerim Pirimqululy qazirgi tańda qalyptasyp otyrǵan jaǵdaılardy eskere kele, Parlament Májilisine eń aldymen, óz saılaýshylary tolyqtaı sengen jáne sol senimge sáıkes, úlken jaýapkershilikti moınyna alǵan bilimdi de bilikti kásibı mamandar kelýi qajettigine toqtaldy. «Qazir Eńbek týraly» jańa Kodekske baılanysty barlyq eńbek ujymdarynda ujymdyq kelisimsharttar ázirlenip, sol boıynsha arnaıy komıssııalar quryldy. Aldaǵy ýaqytta da elimizde oń ózgerister bolady degen senimimiz mol. Bul Elbasynyń basshylyǵymen syn saǵattardan súrinbeı ótýimiz úshin, ıgi bas­tamalardy júzege asyrý úshin de qajet», – dedi ol. Láıla EDILQYZY, «Egemen Qazaqstan».