Jastarymyzǵa jetpeı jatqany – ıman men tárbıe

Bas múftı balany dalaǵa tastaý týraly pikirin bildirdi

Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly qoǵamnyń talqylaýyna túsken mektep oqýshylarynyń erte júktilikke tap bolýy, jańa týǵan sábıdi tirideı dalaǵa tastaý oqıǵalaryna oraı oılaryn ortaǵa saldy, dep habarlady QMDB-nyń baspasóz qyzmeti. «Áke ákelik mindetin atqaryp, balaǵa rýhanı tárbıe bermese, ana analyq paryzyn oryndap, meıirimin tókpese, bala ata-ana­nyń qamqorlyǵyn sezinbese, úl­kenderge qurmet kórsetip, batasyn alýdy úırenbese, onda sol otbasynyń oırany shyqpaıdy dep kim aıta alady? Keıbir qa­ryn­dastarymyz, qyzdarymyz bol­mashy turmystyq synaqqa sabyr ete almaı, baýyr eti balasyn tirideı dalaǵa tastap, bol­mysymyzǵa jat minez tanytyp jatqany janymyzǵa batady», – deıdi QMDB tóraǵasy. Bas múftıdiń aıtýynsha, qyzdarymyzdyń orta mektepti de bitirmeı jatyp, erte júktilikke tap bolatyn jaǵdaı qazirgi qo­ǵamda úlken máselege aınaldy deý­ge bolady. «Jastarymyz asyǵys sheshim qabyldaýǵa beıil turady. Ne­ge? Munyń sebep-saldaryn aıt­qanda, qaıtadan sol tárbıeni, ıman­dylyqty, izgilik pen se­nimdi taǵy sóz etemiz. Shyǵys da­nalyǵynda: «Bos arbanyń syl­dyry kóp», – degen sóz bar. Tamyry tereń tartpaǵan tal­dyń da jel shaıqasa qulaýǵa shaq qalatyny sekildi, tula boıy ımanǵa tolmaǵan adam­nyń ǵumyry baıansyz bolady. Qa­ladaǵy keıbir ata-analarymyz ýaqytynyń kóp bó­ligin ju­mysta ótkizedi. Bylaı­sha aıtqanda, óz úıimizdiń «páter­shisine» aınaldyq. Árıne, aqsha kimge qajet emes. Bárine kerek. Alaıda, úıdegi bala­nyń tár­bıesi odan da mańyzdy ekenin ábden eskerýge tıispiz», – degen keńesin jetkizdi. «О́tken joly aqparat qural­darynan sábıin kólikte bosanyp, dalaǵa tirideı laqtyryp jibergen qaryndasymyz týraly qaıǵyly habardy men de estidim. Denem titirkenip, uzaq mazasyz kúı keshtim. Árıne, ókinishti jaǵ­daı. Qyzdy qyryq úıden tyıa bilgen halyqpyz ǵoı. Baıaǵyda boıjetken qyzdar otbasyn qurý týraly anasymen, jeńgesimen syrlasatyn. Qazir bul úrdis azaıyp barady. О́kinishke qaraı, ul-qyzdarymyzdyń tárbıesi ekin­­shi kezekte qalyp qoıdy. Ba­lasyn tirideı ólimge qıǵan sol qa­­ryn­dasymyzǵa qarajat, kıim, bas­pana, taǵy basqa nárse jet­peı jatyr dep aıta almas edik. Jas­tarymyzǵa jetpeı jat­qany rýhanı azyq, ıman, tárbıe. О́ıt­keni, Islam – eki dúnıe baqy­tynyń kilti», – deıdi Erjan qajy Malǵajyuly.