Eýropa lıgasynda «Galatasaraıdyń» ornyna «Astana» oınaýy múmkin

ASTANA. 22 qańtar. «Astana» fýtbol komandasy ÝEFA Eýropa lıgasynyń pleı-off satysynda oınaýy múmkin. Eger ÝEFA bizdiń klýb úshin oń sheshim qabyldasa, elordalyqtar bul týrnırde Túrkııanyń «Galatasaraı» klýbyn almastyrady. Bul týraly fotomac.com.tr basylymyna silteme jasaǵan egemen.kz tilshisi habarlasty. Búginde «Galatasaraı» komandasy Fair Play júıesi boıynsha qarjy qıyndyǵyna tap bolyp otyr. Buǵan deıin klýb ÝEFA tarapynan eskertý alǵanymen, áli kúnge ony oryndamaǵan. Sondyqtan atalǵan uıym Ystambuldyń komandasyn eýrokýboktyq básekelerden shettetip, qatań jazalaýy múmkin. Onyń ishinde aqpan aıynda pleı-off kezeńi bastalatyn Eýropa lıgasy da bar. Al «Galatasaraı» atalǵan týrnır sheńberinde 18 jáne 25 aqpan kúnderi Italııanyń «Lasıo» komandasymen kezdesýi tıis. Aıta keteıik, Túrkııanyń bul komandasy osy maýsymda «Astanamen» Chempıondar lıgasynda bir topta oınady. Nátıjesinde «Atletıko» (Ispanııa) men «Benfıka» (Portýgalııa) birinshi jáne ekinshi oryn alyp, týrnırdiń kelesi aınalymyna joldama aldy. Al úshinshi orynnan kóringen «Galatasaraı» Eýropa lıgasynda oınaý múmkindigine ıe bolǵan edi. Sáıkesinshe, «Astana» topta tórtinshi oryn alǵanyn atap ótken jón. Elaman Qońyr. Derek: fotomac.com.tr. Sýret: fitness96.ru.