Almatyda kóleńkeli bızneske qarsy kúres qarqyn aldy

ALMATY. 1 qańtar. Almatyda kóleńkeli bıznespen kúres qarqyn aldy. Bul týraly Almaty qalalyq memlekettik kirister departamentiniń baspasóz qyzmetine silteme jasaǵan egemen.kz tilshisi habarlady. Búgingi kúni elimizdiń Dúnıejúzilik saýda uıymyna múshe bolýyna baılanysty kóptegen taýarlardyń kedendik baj stavkalary tómendetildi. Sonyń nátıjesinde orta eseptegi kedendik tarıf 10,4 paıyzdan 6,5 paıyzǵa tómendedi. Buǵan qosa, osy jyldyń 1 mamyrynan bastap, syrtqy ekonomıkalyq qyzmettiń taýarlyq nomenklatýrasy boıynsha tómendetilgen stavkadaǵy kedendik baj salyǵy taǵy da kezeń-kezeńimen engizile bastaıdy. Bul syrtqy ekonomıkalyq qyzmetke qatysýshylar men salyq tóleýshilerge jasalǵan úlken jeńildik. Alaıda, tómendetilgen stavkamen ákelingen taýarlar shartty túrde shyǵarylǵan bolyp esepteledi de, Eýrazııalyq ekonomıkalyq odaqqa múshe elderdiń aýmaǵyna aparýǵa tyıym salynady. Sondyqtan da osy talaptardyń oryndalýyn baqylaý maqsatynda Almaty qalalyq memlekettik kirister departamentinde arnaıy úılestirý toby qurylyp, óz jumysyn bastap ketti. Atap aıtsaq, osy jyldyń 28 qańtaryna deıingi málimet boıynsha, 41 salyq tóleýshiniń Dúnıejúzilik saýda uıymynyń tómendetilgen baj stavkasymen ákelingen taýarlarynyń jalpy quny 3,5 mıllıard teńgeni, jalpy salmaǵy 1,4 mıllıon kılogramdy qurady. Olardyń ishinde 11 salyq tóleýshiniń qyzmetine hronometrajdyq tekserý júrgizilip jatyr. Osy oraıda, tómendetilgen stavkamen taýar ákeletin syrtqy ekonomıkalyq qyzmetke qatysýshylar men salyq tóleýshilerge qoıylatyn basty talaptyń biri – elektrondyq esep faktýrasymen jumys isteý bolyp tabylady. Bul talap Eýrazııalyq ekonomıkalyq odaqtyń «Qazaqstannyń Dúnıejúzilik saýda uıymyna qatysýyn júzege asyrý týraly» hattamasymen zańdastyrylǵan. Saýda-sattyqtyń elektrondyq esep-faktýrasy túrine kóshý qaǵazbastylyqty azaıtyp qana qoımaıdy, salyqtyq ákimshildendirý jumystaryn jaqsartyp, kóleńkeli ekonomıka men jalǵan kásipkerlikpen aınalysýǵa jol bermeıdi. Iаǵnı, bıýdjetke túsetin salyq pen basqa da tólemderdi baqylaý sharalaryn jeńildetedi. 28 qańtar kúni úılestirý tobynyń músheleri kezekti reıd barysynda «Mersedes» markaly júk kóligin toqtatty. Tekserý barysynda kólik ıesi Qytaı Halyq Respýblıkasynda shyǵarylǵan taýarlardyń Qazaqstanǵa ákelý zańdylyǵyn dáleldeıtin qujattar kórsete almady. Bul fakti boıynsha ekonomıkalyq tergeý qyzmetiniń qyzmetkerleri tarapynan qylmystyq is qozǵalyp, aldyn ala tergeý sharalary júrgizilýde. Aınash Esalı. Derek: egemen.kz. Sýret: nur.kz.