Qyzylordalyq polıseıler mal urylaryn ustady

QYZYLORDA. 1 aqpan. Syrdarııa aýdany ishki ister bólimi Jergilikti polısııa qyzmetkerleriniń uıymdasqan jedel izdestirý sharalarynyń nátıjesinde 1 táýlik ishinde mal urlyǵy izi sýymaı ashylyp, ákki urylar qolǵa tústi. Bul týraly oblystyq ishki ister departamentine silteme jasaǵan egemen.kz habarlady. Atap aıtqanda, 2016 jylǵy 26 qańtar kúni saǵat 04.00 shamasynda Syrdarııa aýdany, Aqjarma aýylynda 48 jasar aýyl turǵynynyń mal qorasynan bir bas qoıyn urlap bara jatqan jerinen 19 jastaǵy jáne 26 jastaǵy eki azamat ustaldy. Olarǵa qatysty Qylmystyq kodekstiń 188-baby, 2-bóligi, 1-tarmaǵy boıynsha qylmystyq is qozǵaldy. Qazir sotqa deıingi tergep-tekserý amaldary júrgizilýde. Kúdiktiler AIIB-niń ýaqytsha ustaý ızolıatoryna qamaqqa alyndy. Dál osyndaı derek 26 qańtar kúni saǵat 18.00 shamasynda Syrdarııa aýdany, Tereńózek kentinde de bolǵan. Osy aýdannyń 41 jastaǵy turǵynynan Asqar Toqmaǵambetov aýylyna qarasty 8-razezd beketiniń aýmaǵyndaǵy óristen qara tóbeli men qunajanyn urlap ketkendigi jaıly aryz kelip túsedi. Aryz negizinde izdestirý jumystary júrgizilip, nátıjesinde qylmysqa kúdikti retinde aryzdanýshynyń 37 jastaǵy týysqany ustaldy. Tergeý jumystary barysynda kúdikti azamattyń maldardy 43 jastaǵy aýyl turǵynyna satyp jibergeni anyqtaldy. Qazirgi tańda, atalǵan derek boıynsha Qylmystyq kodekstiń 188-baby, 1-bóligi boıynsha qylmystyq is qozǵalyp, sotqa deıingi tergep-tekserý amaldary júrgizilýde. Erjan Baıtiles. Derek, sýret: egemen.kz