15 Aqpan, 2016

Jasóspirimder Olımpıadasy. Qorjynǵa alǵashqy medal tústi

370 ret
kórsetildi
1 mın
oqý úshin
ASTANA. 15 aqpan. Norvegııanyń Lıllehammer qalasynda ótip jatqan jasóspirimder arasyndaǵy II qysqy Olımpıada oıyndarynda Qazaqstan qorjynyna alǵashqy medal tústi. Ony bıatlonnan Arına Pantova enshiledi. Bul týraly Ulttyq Olımpıada komıtetiniń resmı saıty Olympic.kz-ke silteme jasaǵan egemen.kz tilshisi habarlady. Alty shaqyrymdyq sprınttik jarysta synǵa túsken Arına nemis qyzy Djýlıana Frýevırt pen norveg Marta Krakshtad Iohansenge ese jiberdi. Germanııalyq sportshy márege 18 mınýt 23,5 sekýnd ýaqytta kelse, norvegııalyq odan 5,6 sekýndqa qalyp qoıdy. Al otandasymyz márege jeńimpazdan 17,1 sekýndqa keshigip jetti. Osy rette, Iohansende – bir, al Pantovada eki aıyp aınalymy bolǵanyn atap ótken jón. Osy saıysta baq synaǵan taǵy bir qazaqstandyq Evgenııa Krasıkova 15-orynnan kórindi. Al sprınttik jarystyń erler básekesinde jerlesimiz Ivan Darın 26-oryndy mise tutty. Elaman Qońyr. Derek: olympic.kz. Sýret: lillehammer2016.com.