Qalyptasqan dástúr boıynsha aýǵan ardagerlerine syı-qurmet kórsetilip, olardy marapattap, 30 jyl buryn maıdannan oralmaǵandardy eske alýda. Búgingi kúni Qarýly Kúshterde Aýǵan soǵysyna qatysqan 100-ge jýyq adam bar. Olar ofıserlik, serjanttyq jáne azamattyq personal qyzmetinde áskerı qyzmet ótkerýde jáne qazaqstandyq armııanyń ıgiligi úshin óz mindetterin abyroımen atqaryp júr. Elimizdiń barlyq aýmaǵynda osy ataýly kún qarsańynda birneshe saltanatty merekelik is-sharalar ótip jatyr. Almatydaǵy 28 gvardııashy-panfılovshylar saıabaǵynda 200-den asa áskerı qyzmetshi Aýǵanstanda qaza bolǵan jaýyngerlerge qurmet kórsetedi. Is-sharaǵa 61993 áskerı bóliminiń tý ustaýshy toptary, Qurlyq áskerleri men Radıoelektronıka jáne baılanys áskerı ınstıtýttarynyń kýrsanttary, «Jas ulan» áskerı mektebiniń tárbılenýshileri, áskerı úrmeli orkestr, qurmet qaraýyly rotasy, QR QK Aeroutqyr áskerleri men Ulttyq ulannyń áskerı qyzmetshileri qatysady.
Desantshylar jekpe-jek kórsetse, áskerı qyzmetshiler gúl shoǵyn qoıyp, bir mınýt únsizdikten keıin mıtıngti bastaıdy. Astanada saltanatty shara Halyq qaharmany Baqytjan Ertaevtyń qatysýymen QR QK Ulttyq áskerı-patrıottyq ortalyǵynda ótýde. Konserttik baǵdarlamaǵa ortalyq ansambl, áskerı orkestrdiń qoldaýymen QR QK ardagerleri, Aýǵan soǵysynyń ardagerleri, «Jas ulan» mektebiniń tárbıelenýshileri atsalysty. Tarazdaǵy garnızondyq ofıserler úıinde saltanatty is-shara ótti. Respýblıkalyq Aýǵan soǵysyndaǵy múgedekter qoǵamy basqarmasynyń tóraǵasy Altaı Sarmoldaev Aýǵan soǵysynyń ardagerleri men Tájik-Aýǵan shekarasyndaǵy shaıqasqa qatysqandarǵa nagradalar tabys etti. Atalmysh sharaǵa arnalǵan jappaı júgirý «Astana» óńirlik qolbasshylyǵynda ótti. Oǵan 31775, 36352, 55524 áskerı bólimderiniń 400-ge jýyq áskerı qyzmetshisi qatysty.
Saltanatty is-sharany «Astana» óńirlik qolbasshylyǵy áskerleriniń qolbasshysy general-maıor Sultan Kamaletdınov ashty. Odan basqa, oqýshylardyń qatysýymen erlik sabaqtary ótkizildi. Áskerı qyzmetshiler men oqýshylar ınternasıonalıst jaýyngerlermen kezdesti, sol qıyn-qystaý kezeńdi eske alyp, jaýyngerlerimizdiń Otan aldyndaǵy boryshtaryn qalaı adal ári erjúrektilikpen ótegenderin bildi. Áskerı qyzmetshilerdiń pikirinshe, sol bir surapyl soǵystyń bizge bergen ónegesi búgingi kúni de aıryqsha mánge ıe jáne urpaqqa úlgi bolarlyqtaı tálimi mol. «Aýǵanstan – bul áskerı boryshqa degen adaldyqtyń joǵary sezimi. Generadar men ofıserler erlik pen batyrlyqty kórsetti, alaıda, erliktiń eń bir tamasha jarqyn kórinisin qatardaǵy jaýynger sarbazdar kórsetken edi. Myńdaǵan bizdiń sarbazdarymyz batyr atandy: komandırlerdiń keýdesin jaýyp, ottyń qursaýynda qalǵan jaralylardy qutqardy, sarbazdarymyzǵa ǵana tán erlikke toly erekshe qasıetterin pash etti», deıdi ardagerler.
Dastan Kenjalın. Derek, sýret: Qazaqstan Respýblıkasy Qorǵanys mınıstrligi.
