ALMATY. 15 aqpan. Almatydaǵy Mahatma Gandı atyndaǵy №92 mamandandyrylǵan lıseıde jazýshy, dramatýrg Dýlat Isabekov mektep oqýshylarymen kezdesý ótkizdi. Bul týraly egemen.kz tilshisi habarlady.
Jazýshy áńgimesin «Nur Otan» partııasynyń kezekten tys XVII sezine delegat bolyp qatysyp qaıtqanynan bastady. Sezde qaralǵan máselelermen bólisip, balalarǵa qazirgi zamanda tek bilimdi adamnyń ǵana bolashaǵy bar ekenin basa aıtyp, kitapty kóp oqýǵa shaqyrdy. Sonymen birge qazirgi dramatýrgııadaǵy jańalyqtar, óziniń dramatýrgııaǵa kelý joldary, qazirgi akterler týraly, «О́kpek jolaýshy» shyǵarmasynyń Londonda sahnalanýy jaıynda áńgimelep, sońynda oqýshylardyń qoıǵan suraqtaryna jaýap berdi.
Sondaı-aq, mektepte «Qazaq tili men ádebıeti sabaqtarynda oqý saýattylyǵyn arttyrýdyń ońtaıly ádisteri» taqyrybynda qazaq tili men ádebıeti pániniń onkúndigi ótkizildi. Jaratylystaný matematıka pánderine mamandandyrylǵan mekteptegi onkúndik barysynda kórkemsóz oqý saıysy, ashyq sabaqtar, sahnalyq qoıylym, synyptan tys jumystar júrgizildi.
Qazaq tili muǵalimi Janar Úmbetovanyń «Ǵajaıyp sózder álemi» taqyrybynda ótken saıys sabaǵy, qazaq tili men ádebıeti pániniń muǵalimi Gúlmıra Bakenovanyń «HIH ǵasyrdaǵy ádebıetke sholý», «Esimshe men kósemsheni qaıtalaý» taqyrybynda ótken krıterıaldy baǵalaý sabaqtary, qazaq tili men ádebıeti páni muǵalimi Almagúl Tákishevanyń «Leksıkadan ótkendi qaıtalaý» sabaqtary jańa jáne ońtaıly ádis-tásilderge qurylǵan sabaqtar boldy.
Onkúndik sońy Maǵjan Jumabaevtyń «Batyr Baıan» shyǵarmasyn sahnalaýmen qorytyndylandy.
Aınash Esalı.
Derek, sýret: egemen.kz.
