Gınnestiń rekordtar kitabyna engizý kózdelýde

Keshe Ortalyq kommýnıkasııalar qyzmetinde «Jibek joly» rallı-marafonynyń jańa maýsymyna baılanysty baspasóz máslıhaty ótti. Onda rallıdiń bıylǵy baǵdary, uıymdastyrý jumystaryna qatysty málimetter, qazaqstandyq ekıpajdar jáne jobaǵa qatysty taǵy basqa máseleler sóz boldy. Sharaǵa qatysqan Mádenıet jáne sport mınıstrligi sport jáne dene shynyqtyrý isteri ko­mıtetiniń tóraǵasy Elsııar Qanaǵatov rallıdiń Qazaqstan úshin mańyzdy joba ekenine toqtaldy. «Halyqaralyq deńgeıdegi osyndaı aýqymdy saıystardy ótkizý otandyq sporttyń damýyna óz septigin tıgizedi. Sonyń ishinde osyndaı rallıdiń orny erekshe. Sebebi, ol tek belgili bir qalada emes, elimizdiń birneshe óńirin qamtıdy. Nátı­jesinde avto-kerýen ótetin jer­lerde ınfraqurylymdar damyp, shaǵyn jáne orta kásiptiń órkendeýine muryn­dyq bolady. Sondaı-aq, biz­diń ásem tabıǵatymyz ben tarıhı jerlerimiz she­tel­dik qatysýshylardyń qy­zy­ǵý­shylyǵyn oıatatyny sóz­siz. Bul óz kezeginde týrızm sa­lasynyń damýyna sep bolady», – deıdi komıtet tóraǵasy. Elsııar Qanaǵatovtyń só­zine qaraǵanda, «Jibek jo­ly» rallıine qatysýshylar Qos­tanaı, Astana, Balqash jáne Al­maty qalalaryn basyp ótedi. Oǵan Avtomobıl sporty federasııasy men «Samuryq-Qazyna» ulttyq ál-aýqat qory qoldaý bildiredi. Sonymen qatar, jıynda «Jibek joly rallıi» jobasynyń atqarýshy dırektory Sergeı Gırıa saıystyń bıylǵy baǵ­dary men qatysýshylar sanyna toqtaldy. Onyń aıtýynsha, joba 8 shilde kúni Máskeýdiń Qyzyl alańynan bastaý alady. «Jibek joly» alǵash ret 2009 jyly uıymdastyryldy. Sodan beri joba álemdik sportta óz ornyn aıqyndap, kópshiliktiń nazaryn aýdardy. Bıylǵy jarys 16 kúnge jalǵasady. Bul – rallı tarıhyndaǵy eń uzaq merzim. Máskeýden bastalǵan kerýenniń máresi – Beıjiń qalasy. Ol jerge 24 shildede jetemiz dep jos­parlap otyrmyz. Qatysýshylar eki aptanyń ishinde 10 myń sha­qyrymdy júrip ótýleri tıis. Onyń jartysynan kóbi jyl­damdyqty talap etetin arnaıy ýchaskeler. Sondyqtan «Jibek jolyn» uzaq ýaqytta qysqa baǵdardy júrip ótýine baılanysty Gınnestiń rekordtar kitabyna engizý kózdelýde», – degen Sergeı Gırıa bıyl rallı-marafonǵa álemniń ár elinen 120 komanda qatysatynyn aıtty. Sonyń ishinde 15-ke jýyq ekıpaj Qazaqstannyń namysyn qorǵaıdy. Budan bólek, atqarýshy dı­rektor tehnıkalyq qoldaý retinde marafonǵa 16 ushaq pen tikushaq ilesip júretinin jetkizip, «Mundaı shara jarys jolyndaǵy eldi mekenderdiń avıasııalyq ınfraqurylymyn damytýǵa taptyrmaıtyn múm­kindik. Máselen, Balqash syndy shaǵyn qalalardaǵy áýejaılar jarys kezinde kúnine birneshe ushaqtardy qabyldaıtyn bolady. Bul balqashtyqtar úshin úlken tájirıbe bolary anyq. Sondaı-aq, álemniń birneshe eline taraıtyn aldyńǵy qatarly sport arnalary rallıdi tikeleı efırde kórsetedi. Osy rette kórsetilimniń 30 paıyzy jer­gilikti jerdiń tabıǵatyna arnalatynyn atap ótken jón», – dedi. Taǵy bir aıta keter jaıt, marafon kezinde Almatyǵa Eý­­ro­padan 1 myńǵa jýyq qo­naq keledi dep kútilýde. Olar­dyń basym bóligin týrıster men jýrnalıster quraıdy. Demek, bul iri shahar úshin qosymsha tabys kózi bolmaq. Uıymdastyrýshylardyń sózine sensek, atalǵan rallı-marafonnan Qazaqstan kem degende 3,5 mıllıon eýro tabys tabady. Elaman QOŃYR, «Egemen Qazaqstan».