Qamkóńil jandarǵa jasalǵan qaıyrymdylyq

Oblys ortalyǵyndaǵy «Atameken» meıramhanasynda el Táýelsizdiginiń 25 jyldyǵyna arnalǵan «Biz birgemiz!» atty qaıyrymdylyq aksııasy ótti. Oblys ákimdiginiń qoldaýymen «Aqtóbe qalalyq sal aýrýlaryna shaldyqqan azamattardy qoldaý ortalyǵy» qoǵamdyq birlestiginiń uıymdastyrýymen ótkizilgen sharaǵa oblys ákimi Berdibek Saparbaev, memlekettik mekemeler men qoǵamdyq uıymdardyń basshylary, mesenattar, kásipkerler, eriktiler jáne 150 belsendi múmkindigi shekteýli azamat qatysty. Jetimin jylatpaǵan, qamkóńil jandaryn qa­tar­dan qaldyrmaıtyn, qaıy­rymdylyǵyn aıamaıtyn ata-babadan kele jatqan ımandylyq isiniń jalǵasyp, dástúrge aınalyp kele jat­qany kóńil mar­qaıtady. Aksııanyń maqsaty – múm­kindigi shekteýli azamattardy qoldaýǵa, olardyń ózderin qoǵam­nyń tolyq­qandy mú­shesi retinde sezi­nýlerine jaǵdaı týǵyzý bolyp tabylady. Bul aksııa osy baǵyttaǵy baǵaly bastama ǵana emes, qaıtarymdy qaıyrymdylyq shara re­tinde de qundy. Osy ar­qyly qanshama qamkóńil jandardyń júregine izgilik nury quıylady, olar­dy ómirge talaptandy­rady deseńshi. О́ńirde osy aksııa ótki­zilip kele jat­qan 16 jyldyń ishinde sport, má­denıet salalaryn­da, qoǵam­dyq ómirde je­tistikterge jetken 3 myńnan astam ere­sekter men balalar qa­ıyrymdylyq shýaǵyna bólengen eken. Aksııada al­ǵash bolyp sóz alǵan oblys ákimi Berdibek Saparbaev osy aksııany on alty jyl boıy uıymdastyrýǵa uıyt­qy bolyp kele jatqan «Aq­tóbe qalalyq sal aýrýlaryna shal­­dyqqan azamattardy qoldaý or­talyǵy» qoǵamdyq birlestiginiń tóraıymy Qu­­ralaı Báımenovaǵa rıza­shylyǵyn bildire kelip, oblysta 23 myńnan astam múmkindigi shekteýli azamat turatynyn, onyń eki myńǵa jýyǵy 16 jasqa deıingi balalar ekenin jetkizdi. Aksııany uıymdastyrýdaǵy eń basty maqsat – osyndaı múmkindigi shekteýli azamattarǵa kómek kórsetý, kóńil­derin kóterip, qol­tyqtarynan demep, jaq­sylyq jasaý ekenin atap ótti. «Ras, múmkindigi shek­teýli azamattarǵa Úkimet, qo­ǵam tarapynan qamqorlyq jasalyp, kómek kórsetilýde. Elbasy Nursultan Nazarbaev áleýmettik má­se­le­lerge aıryqsha kóńil bólip keledi, múm­kindigi shekteýli jandarǵa turaqty qoldaý kórsetilýde. Jár­demaqylary ósirilip, olardy jumysqa ornalastyrý qolǵa alynýda. Basqa da jeńildikter qarastyrylýda. Búgingi ótkizilip otyrǵan aksııa sonyń dáıekti dáleli ekeni sózsiz», dedi Berdibek Mashbekuly. О́ńir basshysy el Táýelsizdiginiń 25 jyldyǵyna baılanysty sharalar bastalyp ketkenin, oǵan árkim hal-qaderinshe úles qosýy kerektigin eske salyp, jınalǵandardy bú­gingi sharamen quttyqtady, osy aksııany qoldaýǵa kelgen «Nur-Muqasan» dýeti, ánshi Aqylbek Jemeneı jáne «Muzart» tobyna rı­­zashylyǵyn bildirdi. Budan keıin oblys ákimi pe­shenelerine jazǵan taǵ­dyrdyń taýqymetin moıymaı kóterip, óz salalary boıynsha úlken tabysqa jet­ken, elimiz egemendik al­ǵan jyly dúnıege kelgen bir top jasqa azamattyq us­tanymdary úshin «Táý­elsizdik qurdastary» nomı­na­sııa­sy boıynsha Alǵys hat pen aqshalaı syılyq tapsyrdy. Al aksııaǵa qatysýshy­lardy belsendi ómirlik kóz­qarastary úshin quttyqtaý tilegin arnaǵan oblystyq kásipkerler palatasynyń tóraǵasy Nurlybek Mu­qanov múmkindigi shekteýli jan­dardyń eńbek etýge degen qul­shynysy zor ekenin, qazir óz isterin ashyp, tabys taýyp júrgen múgedek jandardyń qatary arta túskenin aı­ryqsha atap ótti. Ol da óz kezeginde je­ke kásip­ker­likpen aınalysyp júr­gen múmkindigi shekteýli 8 aza­matqa «О́z isiniń sheberi» nomınasııasy boıynsha Al­ǵys hat pen syılyqtar usyndy. Sondaı-aq, aksııa aıasynda «Meniń múmkindigim mol», «Janymyzdaǵy jandar», «Ardager» nomınasııalary boıynsha múgedekter qoǵamynyń belsendi mú­sheleri men múmkindigi shek­teýli balalardyń ata-analary marapattaldy. Sha­rada osy ımandylyq istiń bastamashysy Quralaı Báı­­menova jyl saıyn qa­ıyrymdylyq aksııasyn ótkizýge turaqty túrde de­meý­shilik jasap júrgen ká­sipker-mesenattarǵa «Qa­ıyrymdylyq jasaý má­denıeti» nomınasııasyn tabystap, ystyq iltıpatyn jet­kizdi. Olardyń arasynda «Ramazan» JShS basshysy Orynbasar Mýsın, «Qazaq­stannyń halyq banki» AQ Aq­tóbe fılıalynyń dı­rek­tory Apýajan Tóle­ge­nova, «Habar servıs» JShS basshysy Muhtar Ábil­qaıyrov, «Sáýlet Qu­rylys Servıs-2007» JShS dırektory Nurjamal Tań­qaeva syndy mesenattar bar. Aksııa barysynda belgili kásipkerler men iri kásiporyn basshylary óz­deriniń áleýmettik jo­balaryn usynyp, sol ar­qyly múgedek balalardyń «Evrogreıd-2016» halyq­aralyq mýzykalyq fes­tıvaline qaty­sýyna, múm­kindigi shekteýli azamat T.Ma­taevtyń úıine pandýs salyp berýge jáne múge­dek­­terdi jumysqa orna­lastyrýǵa qoldaý kórse­te­tinderinen habardar etti. – Men múgedektigime qara­mastan avtokólik júr­gizip, qalalyqtarǵa taksı qyzmetin kórsetip, óz nápaqamdy ózim aıyryp júrmin. Qoǵamdyq ju­mys­tardan da qalmaımyn, sportpen aınalysamyn. Tek úıimde pandýs bolmaı qınalyp júr edim. Soǵan qajetti qarjyny bólgen «Dınar-Elektromash» JShS basshysy Sergeı Vıshnıakqa alǵysym sheksiz, – deıdi Temirbek Mataev. Satybaldy SÁÝIRBAI, «Egemen Qazaqtan». Aqtóbe oblysy.