Qojalyqtardy qarjylandyratyn qaýymdastyqtyń qoly uzarady

Astanada «Agroónerkásip keshenindegi nesıelik serik­testikter qaýym­dastyǵy» zańdy tulǵa­lar birlestiginiń qu­ryltaıshylary men «QazAgro» holdıngi jáne «Agrarlyq nesıe korporasııasy» AQ ókilderiniń qatysýymen jalpy jınalys boldy.  Onda 15 jyldan beri elimizdiń aýyl sharýashylyǵyn damytýda tynymsyz ter tógip kele jatqan nesıe seriktestikteri qyzmet aýqymyn ke­ńeıtip, óz qatysýshylaryn nesıe­leýge jasaǵan jańa júıeniń áli de shıratylatyn jáne jetildirile túsetin tustaryn jan-jaqty talqylady. Sharanyń dóńgelek ústel formatyn­da ótken bóliminde jańa júıeni tanystyrǵan qaýymdastyq tóraıymy Almıra Saǵatovaǵa úsh taraptyń je­­tekshi mamandary túrli suraqtar qoıyp, ol shar­ýa qojalyqtaryn qarjy­landyrýdyń jańa júıesindegi paıdaly tustardy maquldap otyrdy. Ár iste shashyrańqy áreket etip júr­gen qojalyqtardyń basyn birik­tirip, qarjylandyrý men aýyl sharýashylyǵyna qajetti zattarmen der shaǵynda qamtamasyz etý isterin úılestiretin jańa júıe tarap­tardyń oıyn dóp basqan sııaqty. Sebebi, jańa júıe árisi Germanııa men Polshanyń, berisi Reseı men qyrǵyz eliniń saladaǵy qarjylandyrý tájirıbelerin zerdeleı otyryp, óz elimizge paıdaly tustaryn iriktep alyp jasalǵany kórinip tur. «Bul jerde Germanııanyń tájirıbesine kóbirek nazar aýdaryp, tıimdi jerlerin úlgi etkenimiz jón dep bilemin. О́ıtkeni, qurylǵanyna júz jyldan asqan kor­­porasııa qazirgi tańda tek aýyl sharýashylyǵyn ǵana nesıeleýmen shektelip qalmaı, eldegi ekonomıkanyń ózge de salalaryn qamtyp jatyr. Biz de aldymyzǵa osyndaı úlken maqsat qoıyp, áreket etsek jón bolar edi. Ondaı bıik maqsatqa qulash urýǵa memleket jol ashyp, barlyq derlik jaǵdaıdy jasap otyr. Endigi qalǵan is – júıeni barynsha jetildirip, aýyl sharýashylyǵyndaǵy jurtty bir maqsatqa jumyldyra bilý jáne jańa júıemizdiń jemisin qysqa ýaqytta elge usyna alý», dedi tóraıym. Kún boıyna ulasqan sharada qaýym­dastyqtyń ótken jylǵy jumys qory­tyndylary men aldaǵy kezeńge arnalǵan jospary pysyqtaldy. Sóı­tip, taıaý ýaqyt­ta memlekettik organdar men múddeli qury­lymdardyń talqylaýyna shyǵarylatyn nesıe seriktestikterin damytýdyń aı­tylǵan jańa strategııasy utymdy usynystarmen tolyqtyryldy. Jalpy 15 jyl ishinde «Agrarlyq nesıe korporasııasy» AQ qoldaýymen elimizdiń 13 oblysyndaǵy 163 aýdanda 171 nesıe seriktestigi qurylypty. Olardyń aýdandardy qamtý úlesi respýblıka boıynsha 93 paıyzdan asqan. Dál búgingi kúni NS júıesi 12 myńǵa jýyq aýylsharýashylyq taýar óndirýshileriniń basyn birik­tirip otyr. Byltyrdyń ózinde serik­testiktiń qataryna 2240-tan astam jańa qatysýshy tartylypty. Osy kezge deıin NS júıesine kelgen qoja­lyqtarǵa 160 mlrd. teńgeden astam nesıe aqsha berilip, 120 myńǵa jýyq aýyl sharýasynyń jumys orny saqtalyp, qosymsha qyzmet kózderi ashylǵan. Qaýymdastyq jetekshisi Almıra Saǵa­tova­nyń pikirin alǵa shyǵarar bolsaq, seriktestiktiń búgingi úlken maqsaty – NS júıesiniń strategııalyq damý baǵdarlamasyn ozyq elderdiń saladaǵy tájirıbesi negizinde jasap, ýaqyt talabyna saı damytýdy kóz­deıdi. Ol úshin NS-tyń biryńǵaı standarttary men erejelerin engizbek. Sondaı-aq, aýyl sharýashylyǵy koo­pe­ratıvterin damytýmen qatar, nesıeleý bıýrosyna qatys­paq. Bular­men bir­ge qojalyqtar arasynda ynty­maqtastyqqa baǵyttalǵan saq­tandyrý qorlaryn qa­lyp­­­tastyrýdy josparlap otyr. Qu­rylymdaǵy jalpy jıynnyń sońy merekelik sharaǵa ulasty. «Agrarlyq nesıe korporasııa­sy» AQ jetekshileri qurylǵanyna 15 jyl tolǵan NS júıesiniń qatysý­shy­laryna gramotalar tapsyrdy. NS reıtıngileý júıesi boıynsha Aqmola oblysyndaǵy «Selınograd» NS pen Sol­tústik Qazaq­stan óńirindegi «Esil» NS kósh­basshy dep tanyldy. Al ótken jyldyń qo­ry­tyndysy boıynsha eń úzdik seriktestik júldesi Ońtústik Qa­zaq­stan oblysyndaǵy «Iаssy-nesıe» NS-qa berildi. Nurbaı ELMURATOV, «Egemen Qazaqstan».