Qyzylordada taý-ken baıytý kombınatynyń jumysy bastaldy

QYZYLORDA. 17 aqpan. Jańaqorǵan aýdanyndaǵy «Shalkııa» qorǵasyn-myrysh ken ornyn qalpyna keltirý jumystary aıaqtalyp, taý-ken baıytý kombınatyn salý jumystary bastaldy. Bul týraly egemen.kz tilshisi habarlady. Saltanatty sharaǵa aımaq turǵyndary Qyzylorda oblysynyń ákimi Qyrymbek Kósherbaevtyń esep berý kezdesýinde telekópir arqyly kýá boldy. «Shalqııa» polımetalldyq ken ornyn ónerkásiptik baıytý jáne taý-ken baıytý kombınatynyń qurylysy  úsh jylǵa eseptelgen. Iаǵnı, 2019 jyly aıaqtalýy tıis. Bul qurylys aıasynda qýaty 2 mln. tonna taý-ken baıytý kombınatynyń  birinshi  kezegi jáne gazotýrbınalyq elektrostansııasy salynady. Qurylysqa myńǵa jýyq adam tartylatyn bolady. 2018 jyldyń I toqsanynda – ken-baıytý kombınatynyń alǵashqy kezegin iske qosylady. Sonymen birge ken ornynda gıdrometallýrgııalyq zaýyt salý jobasynyń tehnıkalyq-ekonomıkalyq negizdemesin daıyndaý jumystary bastaldy. «Kásiporyn naryqta suranysqa ıe jańa ónim túrlerin shyǵaryp, ony ishki jáne syrtqy naryqqa satamyz. Bul óńir ekonomıkasyn damytýǵa úlken septigin tıgizedi. Osyndaı jaýapty jumysta el senimin aqtaýǵa bar kúsh-qýatymyzdy salamyz dep Sizderdi sendirgim keledi», deıdi «Shalqııa Sınk» aksıonerlik qoǵamynyń basqarma tóraǵasy Bolat Ramazanov. Aıta keteıik, bul joba ındýstrııalandyrý baǵdarlamasynyń ekinshi kezeńi aıasynda júzege asyrylýda. «Oblystaǵy metallýrgııa jobalaryna zor úmit artatynymyzdy aıttym. Jańa ózderińiz kórgen “Shalqııadan” bólek, osy baǵytta jasalyp jatqan ferroqorytpa zaýytynyń tehnıkalyq ekonomıkalyq negizdemesin ázirleý jumystary bıylǵy jyldyń alǵashqy jartysynda aıaqtalyp, kásiporyn qurylysyna daıyndyq jumystaryn bastaımyz. Sondaı-aq, «Bala-Saýysqandyq» vannadıı ken ornyn ıgerý jumystary jalǵasyn tabady. Bul joba boıynsha óndiristik-saraptaý jumystary aıaqtalyp, bıyl kásiporyn qurylysy bastalmaq. Jyldyń aıaǵyna deıin mashına jasaý zaýyty jobasynyń qujattaryn daıyndaýdy aıaqtaımyz. Qarmaqshy aýdanyndaǵy munaı termınalynyń negizinde az tonnalyq munaı óńdeıtin kásiporyn qurý jobasynyń qujattaryn daıyndaýǵa kiristik. Bıyl aımaqta sement, polıpropılen, sılıkat kirpishi, asfalt beton óndiretin jáne sý shyǵaratyn zaýyttar qurylysyn bastaý josparlanǵan», dedi oblys ákimi Qyrymbek Kósherbaev. Erjan Baıtiles. Derek, sýret: egemen.kz