Álemdegi úshinshi zaýyt

TMD-ǵy alǵashqy kásiporynnyń tusaýy Qyzyljar óńirinde kesilip, zamanaýı tehnologııalarmen jabdyqtaldy Qazaqstan Prezıdenti janyndaǵy Ortalyq kommýnıkasııalar qyzmetinde ótken brıfıngte oblys basshysy Erik Sultanov 2015 jyly óńir ekonomıkasyna 128,4 paıyzdyq ósimmen 154,5 mıllıard teńge ınvestısııa quıylyp, jyl qorytyndysy boıynsha elimizde birinshi oryn ıelengenin jetkizgen edi. Al, bıyl aımaq respýblıkada alǵash bolyp ınvestorlar keńesin quryp, sheteldik iri qarjygerlerdiń qatysýymen forým ótkizýi, birneshe memorandýmǵa qol qoıýy Joldaýda belgilengen jańa ınvestısııalyq saıasatty júzege asyrýdyń naqty dáleli bolsa kerek. Osy oqıǵalardyń izi sýymaı jatyp, ekinshi besjyldyqtaǵy Indýstrııalandyrý kartasyna engen 16-shy joba paıdalanýǵa berildi. Ony turǵyzýǵa «BARTEC-Qazaqstan» kompanııasy qarjylyq qoldaý kórsetip, iske asyrdy. Aldymen álemdegi 3-shi, TMD-daǵy 1-shi kásiporyndy salýǵa teriskeı óńir ne sebepti tańdap alyndy degen saýalǵa keleıik. Investorlardyń sózderine qaraǵanda, oblystyń geografııalyq jaǵynan qolaıly ornalasýy qyzyqtyrǵan kórinedi. Toǵyz joldyń torabynda turǵan Petropavl qalasy arqyly Reseı naryǵyna ótý qaı jaǵynan da tıimdi bolmaq. Ekinshiden, óńir ekologııalyq jaǵynan taza sanalatyndyqtan, bul faktor da jete eskerilgen tárizdi. Bir sózben aıtqanda, ekonomıkalyq artyqshylyqtar az emes. Germanııanyń ataǵy jer jarǵan fırmasy jaıly birer sóz. Búginde tórtkil dúnıeniń 60-qa jýyq elimen áriptestik tyǵyz qarym-qatynas ornatýy, jylytý kabelderin shyǵarýda kóshbasshy sanalatyny zor áleýetinen habar berse kerek. Buǵan «Álemdik naryq kóshbasshylarynyń ensıklopedııa­syna» engenin, ınno­vasııalyq kásiporyn «Top-Novator» júl­desimen marapat­talǵanyn qossaq, tańdaýdyń ánsheıin emestigin aıǵaqtaıdy. Zaýyttyń saltanatty ashylý rásiminde sóılegen sózinde oblys ákimi Erik Sultanov elimizde shetelderlen ınvestısııa tartýǵa ońtaıly ahýal qalyptasqanyn, kásiporynnyń Qazaqstan úshin mańyzdylyǵyn, ónimderi úlken suranysty qanaǵattandyratynyn atap ótti. Quıylǵan ınvestısııalardyń úshten biri agroónerkásip keshenine salynyp kelse, budan bylaı mashına jasaý salasynyń áleýetteri de jete eskeriletin bolady. Alys, jaqyn sheteldermen baılanysty nyǵaıtý maqsatymen 30-dan astam delegasııalar kelip, birqatar mańyzdy jobalardy iske asyrý belgilengen. Osyndaı maqsatty sharalardyń arqasynda sheteldik ınvestısııa mólsheri 60 paıyzǵa kóbeıgen. Alda iri qarjygerlerdiń qatysýymen kóliktik-logıstıkalyq ortalyq, astyq pen maıly daqyldar óńdeıtin zaýyttar salý arqyly 2 myńǵa jýyq jańa jumys oryndaryn ashý kózdelgen. «BARTEC» kompanııasynyń atqarýshy dırektory Haık Laýbhaımer BAQ ókilderine bergen suhbatynda elektrmen jylytý kabelderin jasaıtyn kásiporyn Fransııadan, Germanııadan, Shveısarııadan ákelingen qural-jabdyqtarmen, qondyrǵylarmen jabdyqtalǵanyn, aıyna 250 myń metrge deıin ónim shyǵarýǵa qaýqarly ekenin jetkizdi. Jylytý kabelderin turǵyn úı-kommýnaldyq, hımııa, farmasevtıka, munaı, gaz salalarynda, qysta sýmen jabdyqtaý qubyrlarynda keńinen qoldanýǵa, osylaısha oqys jaǵdaılardyń aldyn alýǵa bolady. Jasalý tehnologııasy halyqaralyq talaptarǵa saı keletindikten, qaýipsiz ári ekologııalyq jaǵynan taza. Paıdalaný merzimi on jyldan kem emes. Baǵasy da qoljetimdi. Ázirge 15 adam jumysqa tartylyp otyr. Aldaǵy ýaqytta óndiris aýqymy keńeıgennen keıin qosymsha 30 jumys orny qurylyp, kabeldiń birneshe túri shyǵarylady. Oǵan tolyq múmkindik bar. О́ıtkeni, osyndaǵy mamandar Germanııada úsh aılyq óndiristik tájirıbeden ótip, kásibı jaǵyna shyńdalyp qaıtqan. О́mir ESQALI, «Egemen Qazaqstan». Soltústik Qazaqstan oblysy.