Sandyq tehnologııa – álemdik damýdyń aınasy

Halyqaralyq sharanyń maqsaty – sandyq tehnologııa­lardy ómirge dendep engizip, onyń áleýmettik toptar saty­syn­daǵy halyqtyń ómirine eleý­li túrde tıgizetin áserin aıǵaq­taý ekeni bıik minberge shyqqan sóıleýshilerdiń alǵashqy sózinen-aq anyq baıqaldy. «Sandyq tehnologııalar qazirgi kezde álemde keńinen taralýda. Alaıda, olardy paıdalanýdyń artyqshylyqtary, ıaǵnı sandyq dıvıdendter ómir­den kesheýildep oryn tabýda. Kóp jaǵdaıda bul tehnologııa­lar ekonomıkanyń damýyna, qyzmet kórsetý sapasyn art­tyrýǵa septigin tıgizetini daýsyz. Alaıda, ókinishke qaraı, olar­dan kelip túsetin dıvıdendter bir­kelki taratylyp jatqan joq», dedi memlekettik sektorlar salasy boıynsha aǵa maman ári baıan­damanyń teń avtory Zahıd Hasnaın. О́z kezeginde sóz alǵan Investısııalar jáne damý mınıstri Áset Isekeshev sandyq tehnologııanyń ekonomıkadaǵy báskelestik pen turǵyndardyń turmysyn jaqsarýdaǵy atqaratyn jetekshi róline toqtaldy. «Elimizde Elbasynyń tapsyrmasy boıynsha ekonomıka men áleýmettik salalarda sandyq júıeni jetildirýdiń jańa jobasy jasalyný ústinde. Onyń ishine keń jolaqty ınternetke barlyq aýmaqta qol jetkizý, zańdyq qujattardy qaıta qaraý, mamandardy qaıta daıarlaý sekildi basqa da baǵyttar kiredi. Elbasy atap ótkendeı, bul búgingi kúnniń shyndyǵy – sapalyq ósimge múmkindik berer dańǵyl jol.» Álemdik mańyzy bar jıynda jańa baǵdarlamanyń Qazaqstannyń áleýmettik-ekonomıkalyq damýynyń negizgi draıverleriniń birine aınalatyndyǵy da atap ótildi. Ol – turǵyndardyń keńjolaqty ǵalamtorǵa qol jetimdiligin qamtamasyz etý, qoǵamnyń sandyq saýattylyǵyn arttyrý jáne elektrondy úkimetti odan ári damytý ekeni barshaǵa aıan jaıt. Almatyda bas qosqan Dúnıejúzilik bank sarapshylary Ortalyq jáne Ońtústik Azııa elderi ashyq teńizge shyǵa almaǵanmen mobıldi telekommýnıkasııalyq ınfraqurylymdardy jaqsartý salasynda edáýir ilgeri qadam jasap úlgergenin de mysalǵa keltirýdi umytpady. Sandyq tehnologııanyń áleýetti múmkindikterin meılinshe keń paıdalaný jolynda Qazaqstanǵa tabys tiledi. Talǵat SÚIINBAI, «Egemen Qazaqstan». Almaty.