Ulttyq mýzeıde ǵarysh zaly ashylmaq

Bul týraly qazaqtyń tuńǵysh ǵaryshkeri Toqtar Áýbákirovpen bolǵan kezdesýde aıtyldy Qazaqstan Respýblıkasynyń Ulttyq mýzeıinde qazaqtan shyqqan tuńǵysh ǵaryshker, Keńes Odaǵynyń Batyry, Halyq qaharmany, tehnıka ǵylymdarynyń doktory, professor Toqtar Áýbákirovpen kezdesý bolyp ótti. Ulttyq mýzeı dırektory Darhan Myńbaı ýaqyt taýyp kelgeni úshin ǵaryshkerge alǵys aıta otyryp, bul kezde­sýdiń mańyzyn taratyńqyrap aıtty. «Búgingi kezdesýdiń basty maq­saty qazaqtan shyqqan tuńǵysh ǵaryshkermen syrlasyp, otandyq ǵarysh salasynyń ótkeni men bolashaǵy jaıly áńgimelesý bolyp otyr. Biz patrıotızm degendi jıi aıtamyz. Al shyn máninde sózimen jáne isimen, búkil jan-dúnıesimen patrıottyqtyń úlgisi dep osy Toqtar Áýbákirovti ataýǵa bolady. Biz bolashaqta ǵarysh álemine baılanysty Ulttyq mýzeıden arnaıy zal ashsaq dep otyrmyz. Sol zaldyń qurylymy jáne bolashaq jumysy jaıynda da ǵaryshkermen aqyldasyp otyrmaqpyz», – dedi D.Myńbaı. Odan ári Toqtar Ońǵarbaıuly ózine tán aqjarqyndyqpen rııasyz áńgime tolǵady. «Bıyl ǵaryshqa kóterilgenime 25 jyl tolady. Osynaý jaýapty mıssııadan súrinbeı ótýime eń basty sebep – qazaq halqynyń maǵan degen kirshiksiz qurmeti men selkeýsiz senimi. Men halqym úshin ushtym jáne sol úshin de úlken qurmetke bólendim. Qaı jerge barsam da «Bizdiń batyrymyz keldi», «Tuńǵysh ǵaryshkerimiz keldi» dep qarsy alady. Sol jurttyń rııa­syz kóńiline dán rızamyn. Men qazaqtyń ulan-ǵaıyr dalasyn ǵaryshtan kórip, qadirin ábden uǵynǵan adamnyń birimin. Sondyqtan, jastarmen kezdese qalǵan jerde Otanymyzǵa degen qurmet, adaldyq taqyryptarynda kóbirek aıtqandy unatamyn. Al­dymda eki bala otyrsa da sóıleı berýge daıynmyn. Bastysy, ol ekeýiniń Qazaqstanǵa degen mahabbatyn, ata-babalarymyzdan qalǵan jerge degen qurmetin arttyra bilsem, ýaqytymnyń bos ketpegeni. Jas kezimde mekteptegi kitaphanadan shyqpaıtynmyn. Sondaǵy bar kitapty oqyp taýystym. Dese de, kóp dúnıege qol jete bermeıdi. Al qazir bári bar, kim qandaı kitap oqımyn dese, qaıda oqımyn dese, kóp múmkindikterdi paıdalanýǵa bolady. Jalpy, adam balasy bilim alýǵa eshqashan sharshamaý­y kerek. Ol kishige de kerek, úlkenge de kerek», – dedi T.Áýbákirov. Halqynyń súıiktisine aınalǵan Halyq qahar­manymen bolǵan kezdesý óte áserli ótti. Ǵylymı qyz­metkerler men ýnıversıtet stý­dentteri ǵaryshker ǵıbratyna dán rıza bolyp tarqasty. Nazar QASYM.