Qabyldaý kestesi qurylady

«Nur Otan» partııasynyń saılaýaldy shtabtarynyń qoǵamdyq qabyldaý bólmeleriniń jumysy týraly aımaqtarmen selektorlyq otyrys ótkizildi. Is-sharaǵa Respýblıkalyq qoǵamdyq qabyldaý bólmesiniń meńgerýshisi Abylaıhan Ospanov, qabyldaý bólmesi meńgerýshisiniń orynbasary Jumajan Júkenov, partııanyń Ortalyq apparaty zań qyzmetiniń konsýltanty Arnur Shegıbaev jáne aımaqtyq qoǵamdyq qabyldaý bólmeleriniń meńgerýshileri qatysty. «Búgingi tańda partııada túrli áleýmettik toptarǵa jatatyn turǵyndarmen naqty is-qımyl jospary ázirlenip, respýblıkalyq jelilik kestesi qabyldanyp, medııa-jospar bekitildi. Aldaǵy ýaqytta elimizdiń barlyq óńirinde senimdi ókilder men depýtattyqqa kandıdattardyń saılaýshylardy qabyldaý jumysyn úılestiretin 16 aımaqtyq jáne 208 aýmaqtyq shtabtyń qoǵamdyq qabyldaý bólmeleri qurylmaq», – dedi A.Ospanov. Saılaýaldy shtabtardyń qoǵamdyq qabyldaý bólmeleriniń jumystaryn uıymdastyrý, mindetterin aıqyndaý týraly sóz qozǵaǵan Jumajan Júkenov, birinshiden, saılaý naýqany kezinde partııanyń qoǵamdyq shtabynyń qoǵamdyq qabyldaý bólmeleri Astana men Almaty qalalarynda jáne oblystarda, aýdan ortalyqtarynda qurylyp, jumys atqaratynyn jetkizdi. «Qoǵamdyq qabyldaý ból­me­leriniń bir ǵana qarjy kózi – saı­laý qorynyń qarajaty. Qoǵam­dyq qabyldaý bólmeleri – qoǵam­dyq shtab apparatynyń qurylym­dyq bólimshesi. Olardyń negizgi mindetteri – partııanyń saılaýaldy baǵdarlamasynyń úgit-nasıhat jumystaryn júrgizý, turǵyndar arasynda saılaý zańdylyqtaryn túsindirý men saılaýǵa qatysýǵa shaqyryp, úgit-nasıhat jumys­taryn uıymdastyrý. Saılaý naýqanyna daıyndyq pen ony ótkizý barysynda zańdy­lyq­tardyń saqtalýyn qamtamasyz etý. Sondaı-aq, saılaýshylardyń usynys-tilekterin jınap, ony taldaý jumystaryn uıym­dastyrý. Bul – bizdiń negizgi min­det­terimiz. Partııanyń qoǵamdyq qabyldaý bólmeleriniń fılıaldary óz jumystaryn kestege sáıkes atqarady», – dedi J.Júkenov. Sondaı-aq, ol saılaý naýqany kezinde qoǵamdyq qabyldaý bólmeleri partııa ǵımarattarynda ǵana ornalasatyndyǵyn, al eger, partııa keńselerinen tys ǵı­ma­rattarda bolsa, ol tek kelisimshart arqyly ǵana júrgizilýi tıis eken­digin atap ótti. «Qoǵamdyq qabyl­daý bólmeleriniń memlekettik uıym­dar men bilim berý mekeme­lerimen bir ǵımaratta jumys atqarý­laryna tyıym salynady», – dedi qabyldaý bólmesi meńgerý­shisiniń orynbasary. Jıyn barysynda saılaýaldy shtabtardyń qoǵamdyq qabyldaý bólmeleriniń saılaý naýqanyna ázirlikteri tekserilip, ádistemelik nusqaýlyqtar jáne zańnamalyq túsindirý jumystary júrgizildi. Olardyń sózderine qaraǵanda, saılaýaldy shtabtardyń qoǵamdyq qabyldaý bólmeleri zańnamaǵa sáıkes jumys istep, senimdi tul­ǵalar men depýtattyqqa kandı­dat­tardyń saılaýshylardy qabyl­daý kestesin qurastyryp, qabyl­daýlaryn uıymdastyrmaq. Láıla EDILQYZY, «Egemen Qazaqstan».