Kórmege qyzyǵýshylyq arta túsýde

Jaqynda Syrtqy ister mınıstriniń birinshi orynbasary, EKSPO-2017-niń Komıssary Rápil Joshybaev bastaǵan qazaqstandyq delegasııa jumys saparymen Belgııa Koroldiginde boldy. Sapar barysynda Belgııanyń Vallonııa aımaǵy isker top­tary­nyń jetekshilerimen jáne ókil­derimen kezdesýler ótkizdi. Vallonııa aımaǵy úkimeti basshy­synyń orynbasary, ekonomıka, bilim, kommersııa jáne jańa tehnologııalar mınıstri Jan-Klod Markýrmen ótkizilgen kelissózder barysynda eki el arasyndaǵy yntymaqtastyq baılanystardyń bolashaǵy tilge tıek etildi. Kezdesý kezinde R.Joshybaev EKSPO-2017 kórmesine daıyndyq barysy týraly keńinen áńgimelep, belgııalyq bıznesmenderdi halyqaralyq kórme jumysyna qatysýǵa shaqyrdy. Taraptar belgııalyq kom­pa­nııa­lardyń «jasyl» energetıka salasyndaǵy yntymaqtastyǵy Qa­zaqstan jáne Belgııa arasyndaǵy ekonomıkalyq baılanystardy jańa deńgeıge kóteretindigin atap kórsetti. Belgııalyq mınıstrdiń aıtýy boıynsha, Koroldik 2050 jyldary eldiń búkil energetıkasyn jańǵyrmaly qýat kózderine kóshirý jóninde asa joǵary jos­par qabyldaǵandyǵyn tilge tıek etti. Osy jańǵyrmaly energetıkany damytý jónindegi ulttyq josparǵa baılanysty 2020 jyly Belgııanyń barlyq energetıkalyq qýatynyń 13 paıyzy balamaly energetıka kózderinen qamtamasyz etiletin bolady. Osy oraıda J.-K.Markýr Astanada ótetin EKSPO-2017 halyqaralyq kór­mesi sheńberinde belgııalyq kompanııalardyń «jasyl» energetıka salasyndaǵy tájirıbesimen bólisetindigin aıtty. Sonymen birge, sapar barysynda R.Joshybaev Vallonııanyń «jasyl» ekonomıkasyn damytý josparyna qatysýshy iri já­ne usaq kásiporyndardy, ýnı­ver­sıtetterdi, zertteý ortalyqtaryn jáne oqý birlestikterin bir ortalyqqa biriktiretin «Green win» atty uıymda boldy. Osy jerde ol jınalǵan isker toptar ókilderin Qazaqstanda bıznesti damytý úshin jasalyp otyrǵan múmkindiktermen jan-jaqty tanystyrdy. Qazaqstan Úkimetiniń ınvestısııalyq ahýaldy jaqsartý maqsatynda is júzine asyryp jatqan tıimdi sharalaryn tilge tıek etti. Kezdesýler qorytyndysynda birqatar belgııalyq kompanııalardyń basshylary Astana qalasynda ótetin EKSPO-2017 kórmesine qatysýǵa qyzyǵýshylyq tanytty. Ulan SANJAR.