«Teńizshevroıl» ótken jyldyń esebin berdi

ALMATY. 17 aqpan. «Teńizshevroıl» jaýapkershiligi shekteýli seriktestigi Atyraý oblysyndaǵy áleýmettik ınvestısııalyq baǵdarlamanyń júzege asýy jónindegi jyldyq jınalysynda is júzindegi baǵdarlamalardyń nátıjesin baıandady. Bul týraly kompanııanyń Úkimetpen jáne jurtshylyqpen baılanys bólimi taratqan málimetterine silteme jasaǵan egemen.kz tilshisi habarlady. «Bıznestiń korporatıvtik jaýapkershiligi boıynsha álemdegi aldyńǵy qatarly tájirıbelerin negizge ala otyryp, «Teńizshevroıl» erikti «Igilik» baǵdarlamasy jáne áleýmettik ınvestısııalar baǵdarlamasy sekildi birqatar maqsatty jobalardy júzege asyrý arqyly Atyraý oblysyndaǵy áleýmettik salany damytýǵa aıtarlyqtaı qarjy jumsaýda», – dedi kompanııanyń bas dırektory Ted Etchıson. Búginde «Teńizshevroıl» áleýmettik mańyzdy máselelerdi sheshýde tájirıbesi bar úkimettik emes uıymdarmen birlesken jumysy óz jemisin berýde. Jyldyq bıýdjeti 1 mıllıon AQSh dollarynan asa quraıtyn áleýmettik ınvestısııalar baǵdarlamasy densaýlyq saqtaý, bilim berýge baǵyttalǵan jobalardy tabysty júzege asyrýǵa múmkindik týǵyzdy. Jyldyq esepke arnalǵan sharada jergilikti kásipkerlik pen jurtshylyqty qoldaýdyń úlgisin kórsetýde úzdik dep tanylǵan birqatar úkimettik emes uıymdar men bir top eriktiler arnaıy syılyqpen marapattaldy. 1993 jyldan bastap kompanııa óz qyzmetkerleri men jergilikti turǵyndardyń ıgiligi úshin Atyraý oblysynyń ártúrli áleýmettik jobalaryna 1,1 mıllıard AQSh dollarynan astam qarjy jumsady. Al 2016 jylǵa Atyraý oblysynyń densaýlyq saqtaý, bilim jáne oqytý salalarynyń sapasyn jaqsartýǵa kómektesý úshin kompanııanyń áleýmettik ınvestısııalar baǵdarlamasyna 1 mıllıon AQSh dollary shamasynda qarjy bólindi. Aınash Esalı. Derek, sýret: «Teńizshevroıl» Úkimetpen jáne jurtshylyqpen baılanys bólimi.