AQSh-ta saıahatshylarǵa arnalǵan ǵarysh kemesiniń tanystyrylymy ótti

ASTANA. 20 aqpan. Amerıkalyq Virgin Galactic kompanııasy saıahatshylarǵa arnalǵan sýborbıtaldyq SpaceShipTwo jańa úlgidegi ǵarysh kemesiniń tanystyrylymyn ótkizdi. Bul týraly TASS aqparat agenttigine silteme jasaǵan egemen.kz tilshisi habarlady. Bul keme osydan bir jarym jyl buryn apatqa ushyraǵan úlgisiniń ornyna shyǵarylyp otyr. Ǵarysh kompanııasynyń ıesi brıtanııalyq mıllıarder Rıchard Brenson Los-Andjeleske jaqyn mańda ornalasqan synaq ortalyǵyndaǵy ushaq turaqtardyń birinde  mamandarǵa, jýrnalısterge jáne Virgin Galactic-tiń áleýetti tutynýshylaryna kórsetti. Syrtqy túri boıynsha kemeniń 2014 jyly qazanda Kalıfornııanyń ońtústigindegi Mohave shólinde ushý synaǵy kezinde qırap qalǵan burynǵy úlgisinen esh aıyrmashylyǵy joq. Zertteýshiler onyń apatqa ushyraýyna negizinen ushqyshtardyń qateligi sebep bolǵan dep otyr. Nátıjesinde olardyń biri qaza taýyp, ekinshisi jaraqat alǵan. Virgin Galactic ókilderi, apattan keıin onyń sebepteri anyqtalyp, tıisti qortyndylar jasalǵanyna jáne jańa nusqasy – VSS Unity ataǵyna ıe bolǵan SpaceShipTwo kemesiniń qaıta qurastyrylǵanda qaýipsizdiktiń barynsha saqtalǵanyna sendirip otyr. Onyń kóp qyzmeti endi avtomattandyrylǵan. Birqatar mindetterdi oryndaý barysynda ushqyshty arnaıy ornatylǵan kompıýter saqtandyryp otyrady. Qurastyrýshylar ázrige onyń ushý synaǵy qashan bolatynyn aıtpady. Buqaralyq aqparat quraldarynyń aıtýynsha, osy jyldyń sońyna deıin júzege asatyn kórinedi. Kóptegen AQSh-tyń ǵarysh salasynyń sarapshylary 2014 jylǵy Virgin Galactic kemesiniń aptynan keıin kompanııa bedeli aıtarlyqtaı tómendegenin málimdedi. Olar bul jobany aqtap alýdyń jalǵyz joly jańa úlgini synaqtan sátti ótkizý deıdi. SpaceShipTwo tek týrıstik maqsatqa ǵana arnalyp daıyndalady. Saıahatshylarǵa eki saǵat boıy júz shaqyrym bıiktikten Jerdi tamashalaý quny 250 myń bolady dep josparlanyp otyr. Keme borty eki ushqysh pen alty jolaýshyǵa ǵana arnalǵan degen boljam bar. Osyndaı jolmen ǵaryshta bolyp qaıtýǵa tilek bildirip otyrǵandar sany 800-den asty. Olardyń arasynda Tom Henks pen Andjelına Djolı sekildi belgili akterler bar. Aıan Ábdýálı. Derek, sýret: TASS.