Kúres túrlerinen Azııa chempıonatynyń 3-kúni qorjynǵa 4 medal tústi

ASTANA. 20 aqpan. Taıland astanasy – Bangkok qalasynda ótip jatqan kúres túrlerinen Azııa chempıonatynda palýan qyzdarymyz qorjynǵa taǵy tórt medal saldy. Bul týraly egemen.kz tilshisi habarlady. Jarystyń úshinshi kúni 69 kıloda baq synaǵan Elmıra Syzdyqova kúmis júldege qol jetkizdi. Ol fınalǵa deıin barlyq qarsylasynan basym túskenimen, sheshýshi synda japonııalyq Sara Doshoǵa shamasy jetpedi. Sonymen qatar, 48 kılo salmaq dárejesinde beldesken otandasymyz Irına Borısova da kúmis medaldi moınyna taqty. Ol fınalda qytaılyq Iýnan Sýnge ese jiberdi. Odan bólek, áıelder kúresinen taǵy eki júldege qol jetkizdik. Naqty aıtsaq, 60 kıloda synǵa túsken Mádına Baqbergenova men 75 kılo salmaqta beldesken Gúlmaral Erkebaeva Azııa chempıonatynyń qola júldegerleri atandy. Júldege talasta Mádına Úndistan senim artqan Sakshı Malıkten 2:0 esebimen basym tússe, Gúlmaral ózbek qyzy Lalahan Orynbaevany 10:0 esebimen tize búktirdi. Aıta keteıik, buǵan deıin grek-rım kúresi palýandarynyń básekeleri ótken bolatyn. Bul synda qazaqstandyqtar 1 – altyn, 1 – kúmis jáne 4 qola medal enshiledi. Atap aıtqanda, Dosjan Qartyqov (75 kg) Azııa chempıony atansa, Ashat Jańbyrov (66 kg) kúmis júldege qol jetkizdi. Sondaı-aq, Meırambek Aınaǵulov (59 kg), Darhan Baıahmetov (71 kg), Ashat Dilmuhamedov (80 kg) jáne Damır Kúzembaev (130 kg) qola medaldi moıyndaryna taqty. Atalǵan saıys 21 aqpanda aıaqtalady. Elaman Qońyr. Derek: egemen.kz. Sýret: facebook.com.