QOSTANAI. 22 aqpan. Qostanaıda Ilııas Omarov atyndaǵy oblystyq qazaq drama teatrynda aqyn Aqylbek Shaıahmetovtyń shyǵarmasy boıynsha qoıylǵan «О́kinish» spektakliniń premerasy ótti. Bul týraly egemen.kz tilshisi habarlady.
Qoıylym HH ǵasyrdyń ekinshi jartysynan bastalǵan halqymyz qasiretiniń biri – qarttar úıi, tastandy qarııalar, urpaq tárbıesi týraly oı qozǵaıdy. Shyǵarmada óz balasy men kelinine syımaı qarttar úıinde turyp jatqan qarııalardyń oı-tolǵanystary beriledi. Taǵdyrdyń mundaı synaǵyna kim kináli? Tasbaýyr bala ma, kórgensiz kelin be, álde bala tárbıesinen osaldyq jibergen ózi me, joq qatygezdenip bara jatqan qoǵam ba? Osy saýaldarǵa qarttar úıinde otyrǵan qarııalardyń ózderi jaýap izdeıdi. Biri qoǵamda ulttyq ıdeologııa joq dese, biri búgingi jas urpaqtyń sanasyn jaýlap alǵan úıdegi kók jáshik televızor ekenin aıtady. Qoǵamnan meıirim-shapaǵattyń kóterilip ketkeni de qarttar aýzymen aıtylady. Sahnadaǵy keıipkerdiń biri jas kúninde qatelikti kóp jibergenin aıtady. Bul da ókinish ózegin tesken keıbir aǵa urpaq ókilderi ómiriniń shyndyǵy.
«Qazaq halqynda «ata-anań jyndy bolsa baılap baq» degen sóz bar. Olar qandaı bolǵanda da, balaǵa ómir syılady, aq sútin berip ósirdi, baqty-qaqty, jetkizdi. Ata-anasyn baqpaı, qaramaı ketý, úıinen shyǵaryp tastaý halqymyz tarıhynda bolmaǵan. Osy shyǵarma jastardyń júregine mysqaldaı da bolsa oı salsa, maqsattyń oryndalǵany», – dedi pesa avtory Aqylbek Shaıahmet. Bas-aıaǵy bir saǵatqa jetpeıtin spektakl óziniń mazmundylyǵymen kórermenderdi baýrap aldy. Qoǵamnyń búgingi ashy shyndyǵyn kórsetýde shyǵarma avtory Aqylbek Shaıahmet, rejısser Erjan Qaýlenov, sýretshi Maralbek Nurmahanov shyǵarmashylyq toppen jumys istegeni, biriniń aıtar oıyn keıingileri jaqsy qoldaǵany baıqalady.
Názıra Járimbetova.
Derek, sýret: egemen.kz.
