KО́KShETAÝ. 22 aqpan. Aqmola oblysynda Táýelsizdik jyldary 552 sport sheberi daıyndaldy. Bul týraly «Aqmola medıa ortalyǵy» baspasóz qyzmetine silteme jasaǵan egemen.kz tilshisi habarlady.
Táýelsizdik jyldary oblysta 9 jańa sport mektebi ashylyp, sportpen aınalysýshylardyń sany eki ósken. Bul 185 myń adam nemese óńir turǵyndarynyń 25 paıyzyn quraıdy. Salany qarjylandyrý sońǵy 13 jylda 12 ese ósse, 2015 jyly sportqa 4,3 mıllıard teńge bólinip otyr. Bul týraly Aqmola oblystyq dene shynyqtyrý jáne sport basqarmasynyń basshysy Nadejda Patıýtkına «Táýelsizdik jyldaryndaǵy sporttyq jetistikter» konferensııasynda málimdedi.
Konferensııada sóz sóılegen oblystyq joǵary sport sheberligi mektebi dırektorynyń orynbasary Roza Jumaǵulova osy 25 jylda 445 sport sheberi, 91 halyqaralyq dárejedegi sport sheberi jáne 6 eńbek sińirgen sport sheberi daıyndalǵanyn atap ótti. Olardyń qatarynda Anatolıı Hrapatyı, Sergeı Kopytov, Dmıtrıı Gaag, Irına Nekrasova, Marııa Graboveskaıa, Nıkolaı Chebotko sııaqty álemdik deńgeıdegi sańlaq sportshylar bar.
Sondaı-aq, Qazaqstan ulttyq qurama komandasyna qabyldanǵan sportshylar sany da artyp otyr. 1991 jyly 30 adam bolsa, 2015 jyly 323 aqmolalyq sportshy respýblıka namysyn qorǵady.
Baqbergen Amalbek.
Derek, sýret: «Aqmola medıa ortalyǵy».
