О́nege mektebi

Elordada Mádenıet jáne aqparat mınıstrligi tapsyrysy boıynsha túsirilgen «Saǵadat Nurmaǵambetov. Sońǵy suhbat» derekti fılminiń premerasy ótti. Fılmniń aty aıtyp turǵandaı, ekrandyq týyndy Keńes Odaǵynyń Batyry, táýelsiz Qazaqstannyń tuńǵysh Qorǵanys mınıstri, armııa generaly, Halyq Qaharmany Saǵadat Nur­ma­ǵam­betovtiń ómiri men ónegelik mektebi týraly baıandaıdy. «Birtýar sardardyń beımálim qyrlaryn ashýǵa kóbirek mán berilgen týyndy kópshilikke unaýy tıis. Qaıratkerdiń ádebıet pen ónerge degen súıispenshiligi, otbasy qundylyqtaryn qorǵaýdaǵy shynaıylyǵy keıingi ósip kele jatqan jas urpaq úshin qashanda úlgi bolyp qala beredi. Mundaı qaıtalanbas taǵdyrlar týraly eshqashan umytpaýǵa tıispiz. Osy oraıdaǵy ıdeıamyzdy oıdaǵydaı júzege asyra aldyq dep esepteımin» dedi fılmniń rejısseri Satybaldy Tekeev jýrnalısterge bergen suhbatynda. Derekti kartına tulǵanyń leıtenant-maıdangerden qol­basshylyqqa deıingi ómir joly, Qazaqstan Qarýly Kúsh­te­rindegi kóp jylǵy qyzmeti týraly baıandaıdy. Týyndynyń basym bóligi rejısserdiń keıipkermen bolǵan biraz jyldar burynǵy sońǵy suhbatyn qamtıdy. Taǵy bir aıta ketetin jaıt, premeralyq kórseti­limdi Qarýly Kúshter ardagerleri keńesiniń jetekshileri men músheleri, ekinshi dúnıejúzilik soǵys pen aýǵan soǵysynyń ardagerleri, basqa da tulǵalar kelip tamashalady. «Men tanymal tulǵanyń shynaıy beınesi órilgen derekti fılmniń avtorlaryna rızashylyǵymdy bildirgim keledi. Ásirese, keleshek Otan qorǵaýshylar men jas áskerıler úshin munyń paıdasy men tárbıelik máni ushan-teńiz. Jáne de kartınany Saǵadat Nur­maǵambetovtiń ómiri týraly aldaǵy túsiriletin fılmder men shyǵarmalardyń basy dep sanaımyn. Onyń ómirlik tájirıbesi bizge qashanda ónege mektebi bolyp qala bermek», – dedi zapastaǵy general-leıtenant, Halyq Qaharmany Baqytjan Ertaev. «Egemen-aqparat».