Ǵaryshker qostanaılyq sábıdiń tusaýyn kesti

Elimizdiń úshinshi ǵaryshkeri, Halyq Qaharmany, «Qazaqstan ǵarysh sapary» UQ» aksıonerlik qoǵamy prezıdentiniń orynbasary Aıdyn Aıymbetovtiń kelýi qostanaılyqtarǵa qýanysh syılady. Ol aldymen A.Baıtursynov atyndaǵy Qostanaı memlekettik ýnıversıtetinde bolyp, oqytýshylar quramymen jáne stýdent jastarmen kezdesti. Jastardyń kóptegen su­raq­taryna jaýap berip, pikir al­masty. Bala kezinen ǵaryshker bolýdy armandap, aldyna maqsat qoıyp, sol jolda tabandylyq kór­setken Aıdyn Aqanulynyń áńgimesi stýdentterdi de rýh­tan­dyrǵandaı edi. Aıdyn munan keıin Dos­tyq úıinde Qostanaı jurt­shy­­­lyǵymen, zııaly qaýym ókil­derimen júz­desti. Kezdesýde qart aqyn Jol­barys Baıazıd, aqyn ustaz Aleksandra Sýs­lo­va ǵaryshkerge arnaǵan óleń­derin oqydy. Sýretshi Nıkolaı Torshın Qostanaı óńiri ta­bıǵatynyń kórinisin beınelegen óz shyǵarmasyn tartý et­ti. Ǵaryshker halqymyzdyń tuń­­­ǵyshtaryn, irilerin bergen topyraqqa kelgenine, kórsetilgen qurmetke rızashylyǵyn bildirdi. Kópshiliktiń suraǵyna jaýap berdi, emen-jarqyn áńgimelesti. Osy kezdesýde halqymyzdyń jaq­sy yrymy da oryndy jasaldy. Ata-anasynyń suraýymen Aıdyn 11 aılyq kishkentaı Bek­nur Mádenıettiń tusaýyn kesti. Aıdyn Aıymbetov oblys ortalyǵyndaǵy «Qaztelekom» aksıonerlik qoǵamynyń oblystyq bóliminiń de qonaǵy boldy. Onda qurmetti qonaqqa qarqyndy damyp otyrǵan baılanys qyzmetiniń jetistikteri kórsetildi. Osy kezdesýde Aıdyn Aqanuly damyǵan baılanys túriniń arqasynda sonaý shalǵaıdaǵy Jankeldın aýdanynyń qurmetti azamattarymen beıne-konferensııa arqyly júzdesip, sálem berdi. Torǵaı óńiriniń aqsaqaldary ǵaryshkerdiń erlikke para-par eńbegine súısinetindikterin aıtyp, tilekterin jetkizdi. Názıra JÁRIMBETOVA, «Egemen Qazaqstan». QOSTANAI.