Ońtústikkoreıalyq dáriger tájirıbesimen bólisýde

О́ńirde Batys Qazaqstan aımaǵynyń jáne Qyzylorda oblysynyń turǵyndaryna qyzmet kórsetetin medısınalyq klaster qurýdyń qadamdary jasalýda. Buǵan deıin Túrkııa, Reseı, Izraıl elderiniń densaýlyq saqtaý salasy ókilderimen yntymaqtastyq memorandýmyna qol qoıylǵan bolatyn. Jaqynda mundaı kelisim Ońtústik Koreıa memleketi ókilderimen de jasaldy. Osy yntymaqtastyq memorandýmy aıasynda oblysqa kelgen Ońtústik Koreıa klınıkasynyń professory Changom Hengom Seoko eki kúnde uıqy bezi aýrýyna shaldyqqan 6 naýqasqa ota jasady. Jasalǵan otalar sátti shyqty. Ol ota jasaýmen birge, aýrýlardy qabyldap, keńes berdi. Oblystyq densaýlyq saqtaý basqarmasynyń deregi boıynsha, sheberlik synybyn ótkizý barysynda ártúrli aýrýlarǵa shaldyqqan 60 adamdy qaraǵan. Hırýrg Chang Heng Seokony qabyldaǵan oblys ákimi Berdibek Saparbaev búgingi tańda óńirde medısınalyq klasterdi qurý oraıyndaǵy basty mindet bilikti medısına kadrlaryn daıarlaý bolyp otyrǵanyn, bul máselede Ońtústik Koreıa dárigerlerine úlken úmit artylatynyn jetkizdi. Ol sondaı-aq, aqtóbelik dárigerlerdiń Chang Heng Seoko syndy kásibı biliktiligi joǵary mamandardyń tájirıbesi men biliminen úırenýlerine múddeli ekenin atap ótti. Chang Heng Seoko óz keze­ginde kórsetilgen senim úshin rıza­shylyǵyn bildirip, aqtóbelik dárigerlermen tájirıbesin bólisýge árqashan daıyn ekenin jetkizdi. Kezdesý sońynda óńir basshysy Azııa – Tynyq Muhıt aımaǵynyń jetekshi ǵalymdarynyń qatysýymen osy jyly oblysta ǵylymı-tájirıbelik konferensııa ótkizýdi usyndy. Satybaldy SÁÝIRBAI, «Egemen Qazaqstan». Aqtóbe oblysy.