Jobalarmen tanysty

Parlament depýtattary S.Plotnıkov, Q.Aıtahanov, R.Ákimov, S.Bilálov, M.Joldasbaev qatysqan Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń kóshpeli otyrysy Jambyl oblysynda boldy, dep habarlady osy palatanyń baspasóz qyzmeti. Otyrystyń negizgi taqyryby «Qazaqstan Respýblıkasynyń keıbir zańnamalyq aktilerine Qazaq­stan Respýblıkasynyń «jasyl eko­nomıkaǵa» kóshýi máseleleri bo­ıynsha ózgerister men tolyqtyrýlar engizý týraly» zań jobasyn talqylaý boldy. Jańartylatyn energııa kóz­deri salasyndaǵy jobalardy iske asy­rýdyń keleshegi qaraldy. Otyrysta Prezıdenttiń 2013 jylǵy 30 mamyrdaǵy Jarlyǵy­men bekitilgen Qazaqstan Respýb­lıkasynyń «jasyl ekonomıkaǵa» kóshýi jónindegi tujyrymdamasyn oryndaý aıasynda jańartylatyn energııany paıdalanýdyń naqty nysandy kórsetkishteri jáne oǵan qol jetkizýdiń qadamdary belgi­lendi. 2020 jyly elimizdiń jalpy energetıkalyq teńgeriminde jańartylatyn energııa kózderiniń úlesin úsh paıyzǵa jetkizý kózdelip otyr. Senatorlar sapar barysynda Ortalyq Azııa aýmaǵyndaǵy jańartylatyn energııa kózderiniń eń iri nysany – qýaty 50 MVt «Býrnoe» kún-elektr stansasynda boldy. Onyń qurylysy aımaqtaǵy elektr energııasynyń jetispeýshiligin eleýli túrde qysqartýǵa múm­kin­dik berdi. Elektr stansasy EKSPO-2017 halyqaralyq kór­me­sin uıymdastyrý aıasynda jarııa etilgen «jasyl ekonomıkany» qalyptastyrý maqsatyna elimizdi ilgeriletýdiń jaqsy ónegesi boldy. Sharaǵa Jambyl oblysy ákiminiń orynbasary E.Manjýov, Energetıka mınıstrligi men «Samuryq-Qazyna ınvest» JShS ókilderi, elektr energetıka kásip­oryn­darynyń basshylary qatysty.