Eńbekkerdiń quqyǵy buzylmaýy tıis

Keshe «Aýyl» halyqtyq-demokratııalyq patrıottyq partııasynyń ortalyq apparatynda jańa redaksııadaǵy Eńbek kodeksiniń negizgi erejelerin túsindirý boıynsha onlaın-semınar ótti. Atalǵan semınarǵa barlyq deńgeıdegi agroqurylym qyzmetkerleri, partııa mú­sheleri, respýblıkalyq qoǵamdyq shtab ókilderi, sonymen qatar, skaıp baılanys arqyly uıymnyń barlyq aımaqtyq qoǵamdyq shtab músheleri qatysty. Jıynda Qazaqstan Kásipodaqtary federasııasy tóraǵasynyń orynbasary Gúlnar Jumageldıeva kásiporynnyń ekonomıkalyq jaǵdaıy nasharlaǵan jaǵdaıda qyzmetkerdi jumystan shyǵarý, tolyq emes jumys rejimi, sondaı-aq, eńbek quqyǵyn qorǵaý jáne ónerkásiptik qaýipsizdik máseleleri boıynsha áńgimelep berdi. Bulardan bólek, G.Jumageldıeva eńbek daýlaryn sheshý máselesine keńinen toqtaldy. Onyń aıtýynsha, Kodekske ujymdyq nemese jeke eńbek daýlaryn sheshý, medıasııa tártibin paıdalaný sekildi jańashyldyqtar engizilgen. Jalpy, «Aýyl» partııasy adamı resýrstardy damytý, jumysshylardyń eńbek quqyqtaryn qorǵaý jáne oǵan kepildik berýdi óziniń basty mindet­teriniń biri dep sanaıdy. Osy mindetterdi júzege asyrý úshin partııa ótken jyly Qazaqstan Kásipodaqtary federasııasymen yntymaqtastyq jáne túsinistik týraly memorandýmǵa qol qoıǵan bolatyn. Sonymen birge, «Aýyl» partııasy «Laı­yqty eńbek» partııalyq jobasyn júzege asyrǵan-dy. Bul joba eń­bek kelisim­shartynyń turaqty ári mindetti túrde jasalýyna, eńbek daýlaryn she­shýdiń tıimdi tásilderin tabýǵa, jumys oryndaryn kóptep ashýǵa baǵyttalǵan. Onlaın-semınar barysynda G.Ju­mageldıeva qatysýshylar tarapynan qoıylǵan kóptegen suraqtarǵa jaýap berdi. Sharada eńbek qarym-qatynasy salasynda qoǵamdyq baqylaý júıesin ornatý baǵytynda halyqtyń saýattylyǵyn kóterý isiniń mańyzdylyǵy atap ótildi. Aıta keteıik, ótken jeksenbide «Aýyl» partııasynyń respýblıkalyq qoǵamdyq shtaby aýyldaǵy úzdik bıznes-jobalardy nasıhattaıtyn «Gúldengen aýyl» aksııasynyń bastalǵanyn resmı jarııa etti. Aksııa maqsaty – barlyq aımaqtardan aýylda júzege asyrýǵa yńǵaıly, keleshegi bar, tıimdi bıznes-jobalardy jınaqtaý. Partııalyq bul jobanyń taǵy bir maqsaty – aýyldyq jerlerde ózin ózi jumyspen qamtyǵan halyq sanyn kóbeıtý. Osy oraıda, «Aýyl» partııasynyń hatshysy Bóribaı Jeksembın: «Aýylda materıaldyq jáne adamı resýrs óte joǵary. Ol búginde tolyq deńgeıde qoldanylmaı otyr. Bul jobanyń negizgi maqsaty – aýyl halqyna óz kásibin bastaýǵa kómektesý, yntalandyrý, bıznes-ıdeıamen bólisý», – dedi. Aksııanyń tusaýkeserine «Aýyl» partııasynyń músheleri, depýtattyqtan úmitkerler, bıznes ókilderi qatysty. Joldybaı BAZAR, «Egemen Qazaqstan». ASTANA.