Chempıondar lıgasy. PSJ men «Benfıka» shırek fınalda (vıdeo)

ASTANA. 10 naýryz. О́tken túnde ÝEFA Chempıondar lıgasynyń shırek fınalyna joldama alǵan taǵy eki komanda anyqtaldy. Atap aıtqanda, qarymta kezdesýde qarsylastaryn 2:1 esebimen jeńgen Fransııanyń PSJ-sy men Portýgalııanyń «Benfıkasy» jarysty jalǵastyratyn boldy. Bul týraly egemen.kz tilshisi habarlady. «Chelsı» (London, Anglııa) – PSJ (Parıj, Fransııa) 1:2 (1:2) Goldar: Dıego Kosta 27 – Adrıen Rabıo 16, Zlatan Ibragımovıch 67. Londondaǵy «Stemford Brıdj» stadıonynda ótken kezdesý tartysqa toly boldy. Alǵashqy oıynda 2:1 esebimen jeńgen parıjdikter kóbine qorǵanysqa kóńil bóldi. Al alań ıeleri jıi shabýyldap, júıeli oınaýǵa tyrysty. Alaıda, esepti qonaq komanda ashty. 16-mınýtta Zlatan Ibragımovıchten pas alǵan 20 jastaǵy Adrıen Rabıo mergendigimen kózge tústi. Desek te, úziliske deıin «Chelsı» oıynshylary Dıego Kostanyń kómegimen tarazy basyn teńestirdi. Ekinshi taımda londondyqtar qansha shabýyldasa da, sońǵy sátte múlt ketip jatty. Esesine, PSJ fýtbolshylarynyń shabýyldary nátıjeli boldy. Naqty aıtsaq, 67-mınýtta Ibragımovıch gol soǵyp, komandasyna jeńis syılady. «Zenıt» (Sankt-Peterbýrg, Reseı) – «Benfıka» (Lıssabon, Portýgalııa) 1:2 (0:1) Goldar: Halk 69 – Nıkolas Gaıtan 85, Anderson Talıska 90+6. «Benfıkanyń» óz alańynda ótken alǵashqy kezdesýde 1:0 esebimen jeńgeni belgili. Bul joly da portýgaldardyń basymdyǵy anyq baıqaldy. Ony oıynnyń statıstıkalyq kórsetkishterinen de kórýge bolady. Máselen, qaqpaǵa týra soqqy baǵyttaý boıynsha «Benfıka» 10 – 4 kórsetkishimen basym tústi. Esepti 69-mınýtta alań ıeleri ashqanymen, matchtyń sońǵy 10 mınýtynda bosańdyq tanytqan olar qaqpalaryna eki birdeı gol jiberip aldy. Nátıjesinde, «Benfıka» shırek fınaldyń joldamasyn ıemdenip ketti. Elaman Qońyr. Derek: egemen.kz. Sýret: championat.com.