Qostanaı alqaptary Iran ınvestorlaryn qyzyqtyryp otyr

QOSTANAI. 10 naýryz. Iran ınvestorlary Qostanaı óńirinen 100 myń gektar qunarly jerdi jalǵa alatyn boldy. Olar bul alqapqa dándi jáne maıly daqyldar egedi. Bul týraly alau.kz saıtyna silteme jasaǵan egemen.kz tilshisi habarlady. Irannyń «Djahar-e-sabz» fırmasy Qazaqstanda birneshe jyldan beri jumys istep keledi. Ol elimiz ekonomıkasyna osy ýaqytqa deıin 20 mıllıon dollar ınvestısııa saldy. Irandyq fırma eldiń batys oblystarynda qus sharýashylyǵymen, ońtústik oblystarda kógaldandyrý isi men aınalysqan bolatyn. Endi Qostanaı oblysynda egin sharýashylyǵyn aınaldyrmaq. Ol úshin Qostanaı óńirinen aýyl sharýashylyǵy maqsatyna 100 myń gektar jerdi jalǵa alýǵa úsh jyldyq joba usyndy. «Djahar-e-sabz» fırmasynyń jetekshisi Seıd Ál Akbar Hoseını: «Iranda astyq pen maılyq daqyldar óte tapshy. Bul problemany biz Germanııa men Argentınadan bıdaı, zyǵyr, raps satyp alý esebinen sheshemiz. Bizdiń eldiń aýylsharýashylyǵy mınıstri osy daqyldardy ózimizdiń egýimizdi mindettedi», – dedi. Investorlardyń aıtýynsha, olardyń bul daqyldardy ósirýde tájirıbesi bar. Al oblys ákimi Arhımed Muhamedov jergilikti dıqandar Iranǵa bıdaıdy burynǵydan úsh ese kóp eksporttaýǵa daıyn ekenin aıtty. Aýyl sharýashylyǵy daqyldaryn satýdy 3 mıllıon tonnaǵa deıin jetkizýge bolady. Biraq bul úshin ákim ınfraqurylym kerektigin eskertti. Qostanaı oblysynyń ákimi Arhımed Muhambetov: «Astyqty artatyn, tasıtyn termınaldardy soltústik oblystardan da salýǵa bolady. Biz oǵan kómek beremiz. Biz jergilikti aýyl sharýashylyǵyn óndirýshiler, tipti shaǵyn qojalyqtar óz astyǵyn eksportqa tikeleı shyǵara alatyn múmkindikke jetýin maqsat tutyp otyrmyz», – dedi. Irandyq ınvestrorlarǵa beretin egis alqabynyń orny áli anyqtalǵan joq. Tek onyń oblystyń topyraǵy qunarly jáne temir jol men tas jol jaqyn, ınfraqurylymy jaqsy soltústik aýdandarynyń birinen bólinetini belgili. Názıra Járimbetova. Derek, sýret: alau.kz.