Elbasy Aqtóbe munaı jabdyqtary zaýytynda boldy

AQTО́BE. 10 naýryz. Elbasy Aqtóbe oblysyna jasaǵan jumys sapary aıasynda búgin Aqtóbe munaı jabdyqtary zaýytynda boldy. Bul týraly akorda.kz habarlady. Qazaqstan Prezıdentine zaýyttyń jańa ónim úlgileri kórsetilip, munaı jabdyqtaryn shyǵarýdyń tehnologııalyq úderisi tanystyryldy. Sondaı-aq, Nursultan Nazarbaevqa óńirdiń áleýmettik-ekonomıkalyq damýy men memlekettik ındýstrııalyq-ınnovasııalyq damý baǵdarlamasynyń júzege asyrylý barysy týraly baıandaldy. Memleket basshysy kásiporyn jumysshylarymen, oblystyń shaǵyn jáne orta bıznes ókilderimen áńgimelesti. Áńgime barysynda Qazaqstan Prezıdenti eldi ındýstrııalandyrýǵa baılanysty jumysshy mamandyqtarynyń mańyzy artatynyn, soǵan oraı memleket bul baǵytta maqsatty túrde jumys júrgizip jatqanyn aıtty. Nursultan Nazarbaev óńir kásiporyndarynda jumys oryndaryn saqtaýdyń, óndiristik úderiske ınnovasııalar engizýdiń mańyzdylyǵyn da atap ótti. Aqtóbe munaı jabdyqtary zaýyty – eldegi munaı kásipshiligine arnalǵan keshendi jabdyqtar shyǵaratyn mamandandyrylǵan mashına jasaý kásipornynyń biri. Qazaqstanda nasos shtangalaryn shyǵaratyn birden-bir zaýyt sanalatyn kásiporyn el naryǵynyń 80 paıyzdan astamyn qamtamasyz etedi jáne О́zbekstan munaı kompanııalaryna jabdyqtar jetkizedi. Satybaldy Sáýirbaı. Derek, sýret: akorda.kz.