Nıý-Iork qalasyna 2015 jyly 58,3 mıllıon saıahatshy keldi

ASTANA. 10 naýryz. AQSh-tyń Nıý-Iork qalasyna 2015 jyly 58,3 mıllıon saıahatshy keldi. Bul týraly TASS aqparat agenttigine silteme jasaǵan egemen.kz tilshisi habarlady. NYC & Company týrıstik-marketıng agenttiginiń dırektory Fred Dıksonnyń aıtýynsha, qala bıligi bıyl bul kórsetkish 2,4 paıyzǵa artyp, sahatshylar sany 59,7 mıllıonǵa jetedi degen boljam jasap otyr. Olardyń arasynda AQSh-tyń ózge qalalarynan, sondaı-aq, álemniń túkpir-túkpirinen keletin saıahatshylar bar. Aldyn ala boljam boıynsha, 2016 jyly týrısterdiń basym kópshiligi Qytaıdan keledi. Mamandardyń aıtýy boıynsha, Aspanasty elinen Nıý-Iork qalasyna 920 myń adam keledi. Bul kórsetkish ótken jylmen salystyrǵanda 8,2 paıyzǵa kóp. Al 2018 jylǵa qaraı Qytaıdan 1 mıllıonnan astam adam keledi dep kútilýde. Aıta keteıik, Nıý-Iork qalasyna Anglııa, Kanada, Brazılııa elderinen qydyryp kelýshiler sany áldeqaıda kóp. Qytaı bul rette tórtinshi oryndy ıelenip tur. Aıan Ábdýálı. Derek: TASS. Sýret: bravoavia.com.ua.