Mıanma parlamenti el prezıdenttiginen úmitkerlerin usyndy

ASTANA. 10 naýryz. Mıanma parlamentiniń tómengi jáne joǵary palatalary prezıdenttikke óz úmitkerlerin usyndy. Bul týraly euronews.com aqparat agenttigine silteme jasaǵan egemen.kz tilshisi habarlady. Mıanma elinde qarasha aıynda ótken saılaýda jeńiske jetken Demokratııa úshin ulttyq lıgasy prezıdenttikke úmitker retinde Ý Htına Chjony usyndy. 70 jastaǵy ýnıversıtet professory talaı jyl Ulttyq lıga kóshbasshylyǵy úshin kúresken Aýn San Sý Chjıdiń jeke kólik júrgizýshisi jáne serigi bolǵan. Partııa Htın Chjo kandıdattyǵyn Neıpıdoda ótken parlament otyrysy kezinde tómengi palatadan úmitker retinde usynǵan. Al, Nobel syılyǵynyń laýreaty Aýn San Sý Chjıdiń ózi prezıdent bola almaıdy. Sebebi, Mıanma konstıtýsııasynda týystaryniń biri ózge elderdiń azamaty bolsa, ondaı úmitkerlerdi joǵary memlekettik laýazymdarǵa qoıýǵa tyıym salynǵan. Al búginde Aýn San Sý Chjıdiń eki uly Ulybrıtanııa azamattyǵyn alyp, Londonda ómir súrip jatyr. Budan keıin parlamenttiń joǵary palatasynyń úmitker retinde Chın ulttyq shtatynyń tóraǵasy Genrı Van Thı Iýdy usynǵany belgili boldy. Osy eldiń konstıtýsııasyna sáıkes, parlamenttiń joǵary jáne tómengi palatalary bir-bir kandıdattan usyna alady. Al úshinshi úmitkerdi Mıanmanyń Qarýly kúshteri usynady. Jeńimpaz qarapaıym jolmen – eń kóp daýys jınaýmen anyqtalady. Sondaı-aq, memlekettiń jańa basshysy qyzmetine tek 1 sáýirden bastap kirisedi. Sebebi, dál osy ýaqytta qazirgi prezıdent Teın Seınniń ókilettilik merzimi aıaqtalady. Elaman Qońyr. Derek, sýret: euronews.com.