Bes myń mıldik qashyqtyq (vıdeo)

Qutqarýshysyna rıza pıngvın sonshama jerden júzip keldi Brazılııada zeınetker Joao Pereıra men Dın-Dım degen laqap atty pıngvınniń arasynda kórgen jurttyń júregin tebirentetin kezdesý boldy. Máseleniń mán-jaıy mynadaı. Bul kisi 2011 jyly muhıttyń jaǵasyndaǵy jartastardyń arasynda ashtan ólgeli jatqan kishkentaı qusty kóredi. Sol kezde pıngvınniń denesin maı men mazýt tutas basyp qalǵan eken. Al qanaty tipti kórinbeıdi. Ony kórip, aıap ketken qarııa qolyna alyp, úıine ákeledi. Janýardy týralap kelgen ajaldan anyq arashalap qalǵan Joao aqsaqal biraz ýaqyt ony úıinde mápelep baǵady. Keıin qus birjola bekip, ornynan turǵan kezinde oǵan «Dın-Dım» degen at beredi. Sońynan ábden jetilip, qatarǵa qosylǵan kezinde baıaǵy jaǵajaıǵa ákelip, en muhıtyna qaıta jiberedi. Al arada bar-joǵy jarty jyl ótkennen keıin Dın-Dımniń osy jaǵalaýǵa qaıta oralǵanyn kór­gende, Pe­reı­ranyń tań qalysynda shek bolmady. Bir qyzyǵy, pıngvın ózin qutqarýshyǵa alǵys aıtý úshin kelgenin birden bildirip, anadaıdan qarııany kórgennen oǵan tura umtylypty. Mine, sodan beri pıngvın men adamnyń arasyndaǵy osy bir názik te erekshe dostyqtyń sıpatyn jaǵalaýda júretin myńdaǵan adam árdaıym syrttaı baqylap turady eken. Sýda júzetin qus osydan bastap ózin qutqarýshyǵa kelip turýdy daǵdyǵa aınaldyrypty. Sodan keıin ol segiz aı ýaqytyn osynda qarııanyń janynda ótkizip, qalǵan ýaqytynda dúnıege urpaq ákelý úshin Chılı jaqqa qaraı ketedi. Dın-Dım osylaısha óziniń dosymen kezdesý úshin jyl saıyn áldeneshe myńdaǵan mıl jerden kelip turatyn bolypty. Mamandar bes myń mıl (segiz myń shaqyrymnan astam) jerdi júzip ótý sýda júzetin qus úshin de rekord bolyp tabylatynyn aıtyp otyr. Murat AITQOJA. Pıngvın men qutqarýshysynyń kezdesýleri týraly vıdeony habardyń saıttaǵy nusqasynan kóre alasyzdar. https://youtu.be/MWC5qeV-7ZU