Baýyrmaldylyqqa baýlıtyn bastama

Astanalyq Arman Shekimov kómekke asyǵady Pendeliktiń perdesin túrip tastap, bir sát adamgershiliktiń tusyna aıaldaıyqshy. Abaıdyń suraǵyn ózińizge qoıyp kórińizshi? Osy jasqa deıingi ǵumyryńyzdy qalaı ótkizdińiz? Arnaıy ýaqy­tyńyzdy bólip muqtajdyń mu­ńyna, jarlynyń jaǵdaıyna úńilip kórdińiz be? «Iá» deseńiz, nur ús­tine nur, «joq» deseńiz, sizdiń áli de ýaqytyńyz bar. Se­bebi, qazir elimizde «Jaqsylyq jasa» ataýy­men aýqymdy aksııa ótýde. Halyqtyń kóbi qoldarynan kelgen kómekterin kórsetip, at­salysyp jatqanyn áleýmettik je­lidegi jazbalardan baıqaýǵa bolady. Jobany uıymdastyrýshy, bloger Maqsat Tólegenov eki ap­tanyń ishinde elimizdiń túkpir-túkpirinen 100-den astam jazba men beıne rolıkter kelip túskenin jetkizdi. Sondaı-aq, «Qazkontent» AQ basqarma tóraǵasynyń orynbasary Zarına Nurlanova, «Úı» qoǵamdyq qorynyń basshysy Arý­jan Saıyn, «7-arnanyń» atqarýshy dırektory Baqyt Ál­peıisov, «Tengrınıýs» saı­tynyń bas redaktory Aıbek Al­dabergenov, ánshiler Dımash Qudaıbergen men Móldir Áýel­bekova da baýyrmaldyqqa baýlıtyn osynaý izgilikti bastamany qoldaıtyndyqtaryn bildirdi. Mysaly, soltústik­qazaq­stan­dyq polıseılerdiń baspanasyz jandarǵa jyly kıim-keshekter taratqany, Pavlodar qalasynyń kásipkerleri turmysy tómen aza­mattarǵa azyq-túlikti tegin usy­nyp jatqany, Pavlodar aýdanyna qarasty Efremovka aýylynda muqtaj jandar úshin tegin nan úlestirilgeni, tal­dy­qorǵandyq kásipkerdiń jetim balalarǵa kóńildi de kórikti demalys syılaǵany atalmysh aksııa aıasynda atqarylǵan ister ekenin esterińizge salamyz. Son­daı ıgi iske beıjaı qaramaı, bel­se­ne aralasqan azamattardyń qatarynda Astana qalasynyń turǵyny Arman Shekimov te bar. Ol óziniń bos ýaqytynda jeke kóligimen muqtaj jandardy kerek jerine tegin jetkizip salyp, alyp qaıtyp, ártúrli qıyndaý máselelerin qınalmaı sheshýge kómektesýde. – Men saýda psıhologııasynyń trenıng-menedjerimin, jumys kúnde bola bermeıdi. Dıvanda shalqadan túsip jata bergenshe, bos ýaqytymdy osyndaı jurt­qa paıda keltiretin jumysqa jum­saǵanym durys bolar dep sheshtim. Birde, bir tanysymmen sóılesip otyrǵanymda, ol óziniń aıaǵynan júre almaıtyn qurbysy bar ekenin, oǵan kómek kerektigin aıtty. Ol qyz jaldamaly esepshi bolyp jumys isteıdi eken. Kerek jerine jetkizip júrdim. Alǵashqy jumysym osylaı bastaldy. Keıin meniń telefon nómirim jan-jaqqa taralyp, kómekke muqtajdar kó­beıdi. Sosyn basqalar da bil­sin dep, Feısbýk áleýmettik jeli­sine jazyp edim, kóp pikirler qal­dyryp, kómek kerek qanshama jandar habarlasty. Búginde olarmen dos bolyp ta kettik, – deıdi ol. Múgedek jandardy kerek je­rine jetkizip tastap, múmkindigi jetetin sharýalaryn sheship berýden bólek, Armannyń jasap júrgen taǵy bir jaqsylyǵyn jasyryp qalǵymyz kelmedi. Ol kez kelgen dúkennen birneshe ból­ke nan satyp alyp, sol satyp alynǵan nandardy satýshyǵa tabystap, ony turmysy tómen jandarǵa tegin berýin tapsyrady eken. Armannyń atqaryp júrgen osy izgilikti isine stýdentter men mektep jasyndaǵy oqýshylar da qyzyǵýshylyq bildirýde. Tipti, sizben birge júrip muqtaj jan­darǵa kómekteskim keledi degender de tabylyp jatqan kórinedi. Al bunyń ózi «búgingi búldirshinniń sanasy ınternetke baılaýly» dep baıbalam salyp júrgenderdiń aýzyna qaqpaq bolary daýsyz. – Meniń maqsatym maqtaý sóz estip, marapat alý emes, deı­di bizdiń keıipker. – Jasaǵan kish­ken­taı jaqsylyǵymyz keıde qo­ǵamǵa úlken ózgeris ákelýi ábden múmkin. Kómekke muqtaj jandarǵa qolymnan kelgenshe paıdamdy tıgize alsam, men úshin odan asqan jetistik joq, – dep aǵynan jaryldy Arman. Jarty álemdi jaýlaǵan Ámir Temir jalǵan dúnıeden óter aldynda janyndaǵylarǵa amanat aıtypty: – Men ólgen soń jylap-syq­tap, daýys kótermeńder. Onyń túkke qajeti joq. Ajaldy aıqaı­lap, qorqytyp qýa ma eken? Kıim­derińdi jyrtyp, jyndy adamsha júgirgennen góri, Alladan «Allahý akbar» dep maǵan meıirim tileńder. Júregimdi jylytý úshin «Fatıhany» oqyńdar. Jarty álemdi jaýlaǵan Ámir Temir de meıirimge muqtaj. «Bir kem dúnıe», deıdi Sherhan Murtaza. Bizdiń qoǵam keıde ólgen adam túgili, kóz aldynda júrgen kórshisine de meıirim syılaı almaı jatady. Osyndaı tusta Armannyń isi kópke úlgi bolyp, jastardy jaqsylyq jasaýǵa talpyndyrary sózsiz. Onyń áleýmettik jelidegi paraq­shasyn paraqtap otyryp júzdegen adamdardyń myńdaǵan pikirine kózimiz tústi. Bireýler «Jaraısyń, jalǵastyra ber, sendeı adam­dardyń baryna shú­­kir» dep rııasyz júreginen rızashylyqtaryn bildirip jatsa, endi bireýleri «Bul jáı ǵana áýreshilik, nemese ózine jarnama jasaýshylyq» dep kertartpa pikirdiń kerýenine ilesińkirep ketipti. Bes saýsaqtyń birdeı emestigi belgili ǵoı. Sondyqtan, ondaı qyńyr tartqan adamdardyń kóz­qarasyna bola muratymyzdy muqaltpaý kerek. Arman sııaqty armany bólek azamattardyń kóligimen de, kóńi­limen de atqaryp jatqan saýapty isterin kórip, kókirek qýanyshqa kenelip, jaqsy jandardyń baryna jan jubanady. «Sadaqany saýyńda ber» deıtin qazaq maqalynyń maǵynasy tereń. Biraq, búgingi adamdardyń sanasy sadaqany tek saýdyraǵan baqyrmen shektep qoıatyny qynjyldyrady-aq. Olaı emes, bireýge kúlip qaraǵannyń ózi sadaqaǵa jatpaı ma? Endeshe biz áńgime qylyp otyrǵan keıipkerdiń áreketi keıingi urpaqqa úlgi bolyp, sansyz saýap jazylady dep úmittenemiz. Bir qaraǵanda, bundaı aqpa­rattardyń taralýy «oń qolyń bergen sadaqany, sol qolyń bilmesin» degen qaǵıdaǵa qarama-qarsy kelýi múmkin. Adam balasy álsiz jaratylys ıesi bolǵandyqtan árdaıym eskertýge muqtaj. Sondyqtan, osyndaı ǵıbratty dúnıelerdi kórgen adamnyń kóńiline meıirim uıalasa, júzi jyly, júregi jum­saq jandar kóbeımeı me? Onyń ústine, kúndelikti kúıbeń tirshilik qaıyrymdylyq jasaýǵa moınymyzdy burǵyzbaı tastaǵanyn da moıyndaýymyz kerek. Eki dúnıeniń myrzasy Paıǵambarymyz Muhammed (s.a.ý.) hadısinde habarlap, «Jaqsylyq jasaýda ja­rysyńdar» dep eskertken. Siz úshin túkke turǵysyz nárse bireýlerge baǵaly baılyq, qol jetpes arman bolyp kórinýi ábden múmkin. Sondyqtan da qolyńyzdan keletin kómektiń kólemine qara­maı, shyn júrekten shyǵýyna mán berińiz. Muqtajdarǵa kómek jasaýǵa asyǵyńyz.Astanalyq Arman Shekimovtiń izgilikti úlgisi osyǵan shaqyrady. Raýan QAIDAR, «Egemen Qazaqstan». ASTANA.