Týnıste úkimet áskeri 50 lańkestiń kózin joıdy

ASTANA. 11 naýryz. Týnıstiń Ben-Gerdan qalasynda arnaıy jasaq 50-ge jýyq sodyrdyń kózin joıdy. Bul týraly TASS aqparat agenttigine silteme jasaǵan egemen.kz tilshisi habarlady. Osydan birneshe kún buryn, ıaǵnı 7 naýryzda memlekettiń Lıvııamen shekaralas aımaǵyndaǵy Ben-Gerdan qalasynda lańkester baqylaý beketterine shabýyl jasaǵan. Búginge deıin ekstremıstik uıym men úkimet áskeri arasynda qaqtyǵys bolyp jatyr. Aldyn ala boljam boıynsha, 7 beıbit turǵyn jáne 13 sarbaz qaza tapty. Sondaı-aq, 17 adam túrli deńgeıde jaraqat aldy. Qazirgi kezde aımaqta komendattyq saǵat jarııalanyp, Týnıstiń ońtústigindegi shekaralyq baqylaý beketteri jabyldy. Aıta keteıik, Týnıs saıahatshylar arasynda úlken suranysqa ıe elderdiń biri bolatyn. Alaıda, lańkestik áreketterdiń jıi bolýy memlekettiń týrındýstrısyna keri áserin tıgizdi. Eýropadan keletin saıahatshylardyń sany kúrt azaıdy. О́tken jyldyń 18 naýryz kúni el astanasyndaǵy ulttyq murajaıǵa basa-kóktep kirgen lańkesterdiń áreketinen 20 adam qaza tapty. Al 26 maýsymda Riu Imperial Marhaba qonaq úıiniń aldynda jasalǵan shabýyldan 38 saıahatshy mert bolyp, 40-tan astamy túrli jaraqat aldy. Osyǵan baılanysty júzdegen qonaq úı jabyldy. Aıan Ábdýálı. Derek: TASS. Sýret: gordonua.com.