Múmkindigi shekteýli balalardyń analary bas qosty

Shyǵys óńirinde 59 myńǵa jýyq múmkindigi shekteýli jan bolsa, sonyń ishinde 9 myńnan astamy 18 jasqa deıingi balalar eken. Osyǵan oraı, О́skemende múmkindigi shekteýli balalardy tárbıelep otyrǵan otbasylardy áleýmettik turǵydan qamtamasyz etý máseleleri qarastyrylǵan jıyn ótti. Oblys ortalyǵyndaǵy «Úlbi» qalalyq halyqqa áleýmettik qyzmet kórsetý ortalyǵynda ótken dóńgelek ústelge atalǵan sanattaǵy balalardyń ata-analary men áleýmettik qorǵaý mekemeleri, qoǵamdyq uıymdar ókilderi qatysty. «Qazaqstan múgedekter konfederasııasy» respýblıkalyq qoǵamdyq birlestiginiń prezıdenti Jannat Omarbekova Elbasy Nursultan Nazarbaevtyń tapsyrmasy aıasynda múmkindigi shekteýli jandardy qoǵamnyń tolyq múshesine aınaldyrý baǵytynda memleket tarapynan kórsetilip otyrǵan keleli is-sharalarǵa toqtaldy. Jannat Ánýarbekqyzy Prezıdent Joldaýynda nazar aýdarylǵan máselege oraı, sońǵy eki jyl kóleminde el aýmaǵynda eleýli jumystar atqarylǵanyn, múmkindigi shekteýli jandardyń máselesin tıimdi sheshý úshin qoǵamdyq uıymdar quryp, birlese jumys isteý qajettiligin jetkizdi. Astana qalasy men óńirlerde ashylǵan ońaltý ortalyqtarynyń oń nátıje berip jatqanyn, bilikti mamandar daıarlaý men emdeý kýrs­taryn jetildirý maqsatynda shetel tájirıbeleri engizilip, áriptestik baılanystar ornatylýy Qazaqstannyń múmkindigi shekteýli azamattardy qoǵamǵa beıimdeý baǵytynda atqarǵan is-sharalarynyń naqty nátıjesi ekendigin aıtty. Sondaı-aq, shy­ǵys óńiriniń Besqaraǵaı aýdanyn­da ashylǵan shaǵyn ońaltý orta­lyǵynyń qyzmetin úlgi retinde ataǵan qoǵamdyq uıym jetekshisi, ortalyqta 15 bala tárbıelengenniń ózinde únemi naýqas balaǵa bas-kóz bolýǵa májbúr bolyp otyratyn ata-ananyń jumys isteýine, balanyń ońalýyna, basqa adamdardyń jumyspen qamtylýyna jaǵdaı jasalatynyn jetkizdi. – Basty baılyq – densaýlyq. Alaıda, eshkim aýrýdy surap almaıdy. Bul – synaq. Tirek-qımyl qozǵalysy shektelgen jandar da qoǵamǵa óz paıdasyn tıgizgisi keledi. Jalpy, daýna sındromy qoıylǵan balalar eshqashan aldamaıdy. Sondyqtan, olardy ozyq elderde jumysqa qabyldaý úrdisi bar. Bizdiń elde de osy baǵytta jumystar júrgizilýde. Memleket basshysynyń bul sanattaǵy jandardy qoǵamǵa tartý úshin bergen naqty tapsyrmalary bar, – dedi J.Omarbekova. Dóńgelek ústel barysynda sóz alǵan ata-analar zań­nama­da baspanamen qamtý másele­sinde jetim jáne ata-ana qamqor­lyǵynsyz qalǵan balalarǵa be­riletin áleýmettik qorǵaý máse­­le­siniń múmkindigi shekteýli jan­­darǵa qarastyrylmaǵanyn, tirek-qımyl júıesi shek­telgen balalarǵa arnalǵan arna­ıy mamandandyrylǵan oıyn alań­dary men balabaqshalar, mektepterdi paıdalanýǵa berý jáne jórgek, ortopedııalyq aıaq kıim, estý qurylǵylary, múge­dek arbalary syndy qajet­tilik­termen qamtý jóninde ózekti usynystaryn jetkizdi. Jámıla Ámirǵalıeva balasy­nyń kenetten dertke dýshar bolyp, Almatydaǵy neırohırýrgııa­lyq ortalyqta basyna ota jasal­ǵa­nyn aıtty. Balany emdeýge bar kúsh-jigerin arnap kele jatqan ananyń ózi búginde «Úlbi» ortalyǵynda eńbek etedi. – Kámıla esimdi qyzym О́s­ke­mendegi balalardy ońaltý ortalyǵynda emdeldi. Qazirgi kezde dárigerlik-medısınalyq qorytyndynyń uıǵarymymen mektepke baryp júr. Bul mektepte múgedek balany qabiletine baılanysty eńbekke baýlıdy. «Balbulaq» shıpajaıynda bir aı tegin em qabyldadyq. Járdemaqy alyp turamyz. Balam án aıtqandy, bı bılegendi jaqsy kóredi. Kámılanyń keleshegine úlken úmitpen qaraımyz, – dedi ol. Sondaı-aq, jıynǵa qaty­sýshylar «Úlbi» ortalyǵynda emdik-saýyqtyrý sharalaryn qabyldaıtyn múmkindigi shekteýli balalar qoıǵan «Shalqan» ertegisin tamashalady. Dýman ANASh, «Egemen Qazaqstan».  О́SKEMEN.