Aǵa leıtenant hanym

Áıel zaty – tabıǵatynan sulý jaratylys. Oǵan daý joq. Ásirese, áspeti bólek áskerı kıim kıgen áıel balasy áste ádemi kórinbeı me? Basqaǵa qalaı ekenin bilmedim, ózim úshin solaı. Áskerı kıimdegi áıeldiń beınesinen náziktik pen órliktiń órimin kóremin. Syrym aýdandyq probasııa qyzmetiniń ınspektory Jangúl Bısembıevany kórgende men osylaı súısinip edim. Aqparat salasynyń adamy bolǵanymyz sebepti, bul azamatshanyń qyzmetine júgingen kezderimiz de boldy. Jangúl Bısembıeva – Tas­qudyq aýylynyń týmasy. Jangúldiń ákesi Ǵanı Bısembıev alǵashqy áskerı daıyndyq pániniń muǵalimi-tuǵyn. Áke­niń qyzmettik kıimi bala Jan­gúldi qatty qyzyqtyrdy. Jaltyraǵan ilgekter, jaǵaly jeı­deler, dóńgelengen tóbesi bar bas­kıim – osynyń bári qarshadaı qyzdy armannyń arnasyna saldy da jiberdi. Jangúl áskerı qyz­metker bolamyn dep sheshti. Sóıtti de, mektep bitire salysymen ońtústik astanadaǵy áskerı aka­demııalardyń birine túsýge talpyndy. Talpynystyń bári sátti bola bermeıdi. Baılanysshy bolamyn degen Jangúl synaqtan súrindi. Biraq, armanynan aı­nyǵan joq. Túp atasy áskerı qyzmet qoı dedi de, ózimizdiń Oraldaǵy ekonomıka jáne qarjy kolledjinen «Keden isi» boıynsha jartyjyldyq kýrsty oqyp, meńgerip aldy. Keıin joǵary oqý ornyn «Quqyqtaný» mamandyǵy boıynsha aıaqtady. Aýdandyq ishki saıasat bóliminiń is júrgizýshisi bo­lyp jumysqa ornalasqan ol kóp uzamaı aýdandyq prokýratýranyń keńse meńgerýshisi qyzmetine aýys­ty. Osy qyzmet arqyly jas ma­man zańgerlik bilimin shyńdap, jaqsy tájirıbe jınaqtady. 2011 jyly Jangúl Ǵanıqyzy aýdandyq probasııa qyzmetiniń ınspektory bolyp, jańa ju­mysqa kiristi. Búginde osy salanyń bilikti mamany retinde belgili. Probasııa qyzmetiniń qylmystyq jaýap­kershilikke tartylǵan aza­mat­tardyń esebin júrgizip, olardyń qoǵamǵa qalypty adam esebinde sińisýin qamtamasyz etip, eńbekke aralasýyn, psıhologııalyq ońa­lýyn qadaǵalaıtyn jaýapty jumys ekendigin osy jerde aıta ketken durys bolar. – Qyzmettiń ózine tán aýyrt­pashylyǵy bar. Máselen, qyl­mystyq jaýapkershiliktiń jazasyn tartqan adamdardyń jaǵdaıyna kirý úshin, olardyń túısigin túsiný úshin jaqsy psıholog bolýǵa týra keledi. Áıel zaty ǵoı dep menen jumsaqtyq kútetinder bolady. Ashy­ǵyn aıtaıyn, men qyzmette qatalmyn. Qataldyq bolmasa, tár­tip bolmaıdy. Jumys barysynda beı­mezgil shuǵyl sha­qyrtýlar bolady, onyń ústine túngi kezderde reıdter jasaımyz. Bul ju­mys­tar shydamdylyqty talap etedi. Qyzmetimizdiń bir qyry ishki ister salasyna qatysty bolǵasyn, qarý atý qabiletin de, fızıkalyq bapty da udaıy nazarda ustaımyn. Jumy­symdy jaqsy kóremin, – deıdi ádilet aǵa leıtenanty Jangúl Bısem­bıeva. Keıipkerimiz osydan on jyl buryn jympıtylyq Nurbol degen azamatpen shańyraq kótergen edi. Jangúl búginde eki balanyń anasy. Ol ana bolýdyń da teńdessiz baqyt ekenin tamsana aıtty biz­ge áńgime barysynda. «Sol baqy­tyńyz uzaǵynan bolsyn!» dedik biz suhbat sońynda qaǵaz-qala­mymyzdy jınas­tyryp jatyp. Baýyrjan ShIRMEDINULY, jýrnalıst.  Batys Qazaqstan oblysy, Syrym aýdany.