О́zara túsinistik tanytylǵan kezdesý

Keshe Astanada «Qazaqstan temir joly» UK» AQ prezıdenti Asqar Mamın men «Reseı temir joldary» AAQ basshysy Oleg Belozerovtyń kezdesýi bolyp ótti. Kezdesý barysynda kólik pen logıstıka salasyndaǵy yntymaqtastyqty ári qaraı damytýdyń máseleleri talqylandy. A.Mamın ózara tıimdi áriptestik qatynastardy nyǵaıtý baǵytyndaǵy konstrýktıvti únqatysý, belsendi ózara is-qımyl, úılestirilgen birlesken kúsh-jiger oń nátıjelerge qol jetkizýge múm­kindik berip qana qoımaı, aǵymdaǵy ekonomıkalyq jaǵdaıda Qazaqstan men Reseı temirjol kompanııalary qyz­meti­niń tıimdiligin arttyrýǵa oń yqpal etetinin atap kórsetti. Kelissóz kezinde taraptar basty nazardy eki el aýmaqtarynda tasymal kólemin arttyrý, tranzıttik júk aǵynyn óristetý úshin ońtaıly jaǵdaılar jasaý máselelerine aýdardy. 2014 jyldyń qarasha aıynda Reseı, Qazaqstan jáne Belarýs temirjol ákimshilikterimen qurylǵan Birlesken kólik-logıstıkalyq kompanııany (BKLK) ári qaraı damytý talqylaýdyń negizgi taqyrybyna aınaldy. A.Mamın men O.Belozerov konteı­nerlik servıstik qyzmet kórsetýlerdiń ıntegratory retinde BKLK jumysynyń alǵashqy jumys nátıjelerin oń baǵalaı kelip, atalǵan iske ortaq kózqaras ta­­­nytýdyń mańyzy zor ekenin atap kórsetti. «Qazirgi qalyptasyp otyrǵan kúrdeli ekonomıkalyq jaǵdaıda biz BKLK jobasyn oǵan qatysýshylardyń barlyǵy úshin barynsha ekonomıkalyq tıimdilikpen júzege asyratyn bolamyz», – dep atap ótti RTJ prezıdenti. Atalǵan kompanııa Qytaı – Ońtústik-Shyǵys Azııa – EO baǵytynda jáne keri baǵytta, sondaı-aq, basqa da temir­­­jol baǵyttarynda tranzıttik konteınerlerdiń qyzmet kórsetýshi operatory retinde is-qımyl tanytady. Kezdesý kezinde, sondaı-aq, Qazaq­stannyń eksporttyq júkterin Reseı porttary arqyly úshinshi elderge tasymaldaý máseleleri de qarastyryldy. Atalǵan másele boıynsha tolyqtaı ýaǵdalastyqqa qol jetkizildi. Eki el temirjol basshylary kelissóz­deriniń qorytyndylary boıynsha Eki­jaqty kezdesý hattamasyna qol qoıyldy. Astanaǵa sapary aıasynda O.Be­lozerov lokomotıv shyǵaratyn «Lo­komotıv qurastyrý zaýyty» AQ-ta bo­­lyp, kásiporynnyń qyzmetimen, aldyńǵy qatarly tehnologııalarmen, shyǵarylatyn ónimniń tehnıkalyq sıpattamalarymen tanysty. O.Belozerov, sonymen qatar, «A» sanatyndaǵy Kólik-logıstıkalyq ortalyǵynda (KLO) boldy. Astana qalasynda KLO-ny iske qosý ótken jyldyń sońynda júzege asqan edi. Osyndaı kólik-logıstıkalyq ortalyqtar Qazaqstannyń basqa da birqatar iri qalalarynda salynatyn bolady. Bul, óz kezeginde, óńirlerdiń halyqaralyq deńgeıdegi zamanaýı qoımalarǵa degen qajettiligin jaýyp, júk aǵynyn ońtaılandyrý ortalyqtaryn qurýǵa múmkindik beredi.  «Egemen-aqparat».