Elektoratqa qashanda tynyshtyq qymbat

Ulttyq kitaphana ǵımaratynda Saılaýdy baıqaý jónin­degi respýblıkalyq qoǵamdyq komıssııa (SBRQK) jýrnalıs­terge arnap brıfıng ótkizdi. SBRQK tóraǵasy Nurlan Erim­betov komıssııa músheleriniń oblys jáne aýdan ortalyqtaryna, shal­ǵaıdaǵy aýyldarǵa baryp, sapar barysynda jergilikti partııa uıymdarynyń jetekshilerimen, kandıdattarmen, saılaýshylarmen kezdesýler ótkizgenin, áriptesteriniń qo­ǵamnyń kóńil kúıin baıqap, usy­nystar men eskertýlerdi tyń­daý maq­­sa­tynda sa­parǵa shyqqanyn, endi solardyń birqatarynyń qatysýymen osy brıfıngke jınalyp otyrǵanyn aıtyp, olardyń árqaısysynan kórgen-bilgenderimen bólisýdi surady. Aqtóbe oblysyna baryp óz mıssııasyn atqarǵan komıssııa múshesi Ádil Ahmetov barlyq partııalardyń shtab-páterlerinde bolyp, olarda saılaýǵa qatysty sharalardyń qalaı júrip jatqanyn baıqaǵanyn aıta kelip: «Halyqtyń saılaýǵa degen kóńil kúıi durys. Shtabtarda otyrǵan ókilderiniń de kózqarastary óte jaqsy. Bizge Ýkraına, Taıaý Shy­ǵystaǵy sııaqty jaǵdaı kerek emes, tynyshtyq pen birlik kerek, tek sonyń arqasynda damyp órkendeımiz, dedi kommýnısterdiń shtabyndaǵy ókil. Barlyq partııa ókilderiniń aıtatyny osy. Osydan 10-20 jyldaǵydaı emes, elimizde qazir saılaý mádenıeti áldeqaıda ósti. Halyq aqyldy, kóz­deri ashyq, kókirekteri oıaý olar jeke adamdarǵa emes, partııalardyń tujyrymdamalarynyń qaısy óz kóńilinde mańyzdy oryn alady, sol partııaǵa daýystaryn beredi», – dese, Kamal Burhanov Ońtústik Qa­zaqstan oblysynda bolǵan kezinde barlyq partııalardyń belsendi jumys at­qaryp jatqanyn baǵamdaǵanyn, saılaý jóninde eshbir zań buzýshylyq joq­tyǵyn, ýchaskelerde tizimderdiń óte bir jaýaptylyqpen jasalyp jatqanyn jetkizdi. Brıfıngti qorytyndyla­ǵan Saılaýdy baıqaý jónindegi res­pýblıkalyq qoǵamdyq komıssııa tóraǵasy Nurlan Erimbetov sońǵy kezde TMD baıqaýshylarymen pikir almasqanyn, taıaý ýaqytta ShYU baı­qaýshylarymen kezdesetinin, sondaı-aq, aldaǵy kezde ózge de uıym­dardyń ókilderimen pikir almasý bolatynyn atap ótip, búginde saılaýshylardyń aldaǵy saılaýǵa qatysýǵa belsendi nıet tanytýlaryna basa nazar aýdaryp, daýys berýge qatysý óte joǵary deńgeıde bolady dep kútilýde degen oıyn jetkizdi. Jáne ol bul pikirdi aıtýyna saılaý­shylarmen bolǵan kezdesý kezinde qalyptasqan áser negiz bolǵanyna toqtaldy. «Biz úshin eń bastysy – saılaý kúni zań buzýshylyqtarǵa jol bermeý. Sondyqtan da nasıhat jumystary tıisti deńgeıde júrip jatyr, ıaǵnı aqparattyń barlyǵy adamdar úshin qoljetimdi. Qandaı da bir zań buzýshylyqtar men kemshilikter anyqtalǵan jaǵdaıda prokýratýra organdaryna habarlanady», – dedi N.Erimbetov. Jýrnalıster qoıǵan saýal­darǵa jaýap bergen brıfıngke qatysýshylar úmitkerler arasyn­da tanymal sportshylar men ártis­terdiń bolýyna qatysty jurtshylyq sizdermen kezdesýlerde ne aıtty degenge: «Meniń kez­­desýlerimde, pikir almasýlarda bul taqyryp qozǵalǵan joq. Iаǵnı, qarapaıym adamdardy tizimdegi ánshi nemese sportshynyń tanymaldylyǵy asa tol­ǵandyrmaıdy. Olar úshin par­tııanyń baǵdarlamasy mańyzdy. Kandıdattar tanymal bolǵandyqtan emes, ózderin qalyptastyryp, eńbek etkenderi úshin irikteldi. Atap aıt­qanda, tamyr-tanystyqpen álem chempıony, iri baıqaýdyń laýreaty ataný múmkin emes. Olar osy jolda ózderiniń kúsh-jigerimen ótip, belesterdi baǵyndyrdy. Men úshin bul adamdardyń óz salasyndaǵy má­se­leni egjeı-tegjeıli bilýi óte ma­ńyzdy», – dep jaýap berdi N.Erimbetov. Anar TО́LEÝHANQYZY, «Egemen Qazaqstan». ASTANA.