Birligimiz – bıigimiz!

Qostanaıda «Birlik» saıası partııasynyń kóshbas­shylary jergilikti etnomádenı birlestikterdiń ókil­derimen jáne jastarmen kezdesýler ótkizdi. Solardyń biri – Parlament Májilisi depýtattyǵyna partııa usynǵan kan­dıdat Murat Qojamqulov. M.Qojamqulov ózimen kezdesýge kelgenderge partııanyń saılaýaldy baǵdarlamasy týraly áńgimeledi: – «Birlik» saıası partııasynyń saılaýaldy baǵdarlamasynda negizinen úsh másele qamtylǵan. Áleýmettik ádilettilik, rýhanı damý jáne qorshaǵan ortanyń tazalyǵy – partııa ustanǵan temirqazyq. Osy jumystardyń qaı-qaısysyn da júzege asyrý úshin elimizde, eń bastysy, dostyq, birlik bolýy tıis. Bizdiń elimizde qazaqtarmen qatar kóptegen ulystar turady. Ár ulystyń mádenıetin, salt-dástúrin damytýǵa, tilin umytpaýǵa memleket tarapynan barlyq jaǵdaı jasalǵan. Sondyqtan búginde qazaqstandyq mádenıet paıda boldy. Onyń ereksheligi barlyq ulttar mádenıetimen baıytylǵandyǵynda bolsa kerek. Oǵan búkil dúnıejúzindegi memleketter qyzyǵýshylyqpen qaraıdy, – dedi ol. Kezdesýge kelgender saıası partııa aty­nan saılaýǵa túskeli otyrǵan kandı­datqa suraqtar berdi, pikirlerin ortaǵa saldy. – Men ýkraın ulty ókilderiniń etnomádenı birlestiginenmin. Elimizdegi naýryz aıynda ótetin saılaýǵa tek «Birlik» emes, birneshe saıası partııa túsip otyr. Elimizdi birliginen aıyrmasyn dep tileımin. Qansha partııa bolsa da olardyń bir-birin jamandaýy, jala jabýy, aıqasýy joq. Olardyń barlyǵy da Qazaqstannyń damýy úshin, halqymyzdyń qýatty turýy úshin túrli problemalardy kóterip jatyr. Mine, rýhanı damý dep osyny aıtady. Biz soǵystan keıingi aýyr jyldardy kórgen urpaqpyz, tynyshtyqtyń qadirin bilemiz. Halqymyzdyń birliginen asqan baqyt, alar bıik joq. Qazaqstanǵa jas kezimde tyń kóterýge kelgenmin. Sodan qaldym, meniń barlyq baqytym, taǵdyrym tek Qazaqstanmen baılanysty, – dedi Valentına Svırıdeskaıa. M.Qojamqulovqa jastar jaǵy da suraq qoıdy. A.Baıtursynov atyndaǵy Qostanaı memlekettik ýnıversıtetiniń birinshi kýrs stýdentteri partııanyń jas­tar qanaty týraly bilgisi keldi. Kezdesý qonaǵy olarǵa partııanyń jastar qanaty bar ekendigin, ol týraly oblystyq fılıaldan bilip, partııa ótkizetin aksııalarǵa, basqa da sharalarǵa qatysýyna, kerek dese, partııaǵa múshelikke ótýine de bolatyndyǵyn aıtty. Aksııa demekshi, «Birlik» partııasy Qazaqstan sýretshileriniń baıqaýyn ótkizip, odan jeńip shyqqan jumystardy satyp, onyń qarjysyn aq qan aýrýymen aýyratyn balalar úshin aýdardy. Sonymen qatar, Táýelsizdik jyldary ómirge kelgen jas aqyndar músháırasyn ótkizdi. «Birlik» partııasy ultaralyq birlik, dostyq, tatýlyq bolýy úshin rýhanııatty damytý kerek degen ustanymdy ustanady. Partııa belsendisi M.Qojamqulov qostanaılyq saılaýshylarǵa osy máseleni erekshe aıtyp túsindirdi. Názıra JÁRIMBETOVA, «Egemen Qazaqstan». QOSTANAI.