Bangladeshte eki qolyn súıel basqan naýqasqa ota jasaldy

ASTANA. 13 naýryz. Bangladeshte dárigerler eki qolyn tutastaı súıel qaptapǵan naýqasqa kúrdeli ota jasady. Bul týraly 24.kz-ke silteme jasaǵan egemen.kz tilshisi habarlady. Dárigerler kúndelikti tájirıbede jıi kezdese bermeıtin eń kúrdeli otany jasady. Atap aıtqanda, bul jolǵy naýqastyń derti bólek. 10 jyldan beri aýrý azabyn tartyp kelgen 25 jastaǵy Abýl Baıandra «epıdermodısplazııa verrýsıformıs», ıaǵnı qarapaıym tilde «aǵash adam» degen dertke shaldyqqan. Aýrýy asqynǵanǵa deıin arbakesh bolǵan ol qazir óz qolymen tamaq ishe almaıdy. Sebebi aǵash tamyryna uqsas súıel, onyń alaqany men saýsaqtaryn túgel basyp ketken. Aıta keteıik, 3 saǵatqa sozylǵan otadan shyqqan dárigerler jara orny bitýi úshin taǵy 6 aı ýaqyt qajet deıdi. Sondaı-aq, plastıkalyq hırýrg Samanta Lal Sen «Biz naýqasty tolyqtaı tekseristen ótkizip, súıeldi joıý úshin alǵashqy operasııa jasadyq. Biraq operasııa sany 10-12-ge deıin barýy múmkin. Oǵan qosa naýqastyń terisi men qan quramyn Amerıkaǵa saraptamaǵa jiberip, nátıjesin kútýdemiz. Biz onyń eki qolyna da operasııa jasap, súıeldiń ósýin toqtatamyz dep oılaımyz», – dedi. Jalpy, Abýl Baıandra mundaı dertke shaldyqqan álemdegi tórtinshi adam. Talǵat Raıymbek. Derek, sýret: 24.kz.