Elbasy Túrkııa prezıdentine kóńil aıtý jedelhatyn joldady

ASTANA. 14 naýryz. Elbasy Túrkııa Respýblıkasynyń prezıdenti Rejep Taııp Erdoǵanǵa Ankara qalasynda bolǵan terrorlyq aktige baılanysty kóńil aıtý jedelhatyn joldady. Bul týraly akorda.kz habarlady. Jedelhatta qaıǵyly oqıǵa saldarynan kóptegen jazyqsyz adamdardyń qaza bolǵany jáne zardap shekkeni týraly habardy Qazaqstan Prezıdenti zor kúızelispen qabyldaǵany atap ótilgen. «Elińizben kórshi aımaqtaǵy turaqsyzdyq pen halyqaralyq terrorızmniń órshýine qaramastan, Túrkııa ishki turaqtylyǵy men qaýipsizdigin nyǵaıtyp, qazirgi zaman qaýip-qaterlerine qarsy kúreste tabandylyq tanytatynyna senimdimin. Halyqaralyq terrorızmniń tamyryna balta shabý álemdik qoǵamdastyq aldynda turǵan eń ózekti mindet dep sanaımyn», – delingen jedelhatta. Memleket basshysy Qazaqstan HHI ǵasyrdyń eń qaýipti qaterine qarsy kúreste baýyrlas túrik halqyn qoldaıtynyn atap aıtty. Sońynda Nursultan Nazarbaev Qazaqstan halqynyń jáne jeke óziniń atynan Rejep Taııp Erdoǵanǵa, qaza tapqandardyń týys-týǵandaryna, sondaı-aq, barsha Túrkııa halqyna kóńil aıtyp, zardap shekkenderdiń tezirek saýyǵyp ketýine tilektestigin bildirdi. Elaman Qońyr. Derek, sýret: akorda.kz.