Qaraǵandyda jalǵan habarlama bergen kúdikti ustaldy

QARAǴANDY. 14 naýryz. Qaraǵandy oblysynda daıyndalyp jatqan terrorızm aktisi týraly jalǵan habarlama bergen kúdikti qolǵa tústi. Bul týraly oblystyq ishki ishter departamentiniń baspasóz qyzmetine silteme jasaǵan egemen.kz tilshisi habarlady. Kúdikti Abaı aýdandyq ishki ister bólimine telefon soǵyp, Almatyǵa ketip bara jatqan bir er adamnyń sómkesinde jarylǵysh zat bar dep habarlaǵan. Polısııa qyzmetkerleri sekem týdyrǵan jolaýshyny Qaraǵandynyń temir jol vokzalynda ustady. Alaıda tekserý barysynda er adamnyń sómkesinen eshqandaı da jarylǵysh zat tabylmady. Esesine, vokzal ǵımaratynan 245 adam syrtqa shyǵaryldy. Sol kúni tártip saqshylary telefon arqyly jalǵan málimet bergen kúdiktini qolǵa túsirdi. Ol óziniń mas kúıindegi bul áreketine áıeline degen qyzǵanyshtyń túrtki bolǵanyn aıtyp, aqtalǵan. Qazirgi kezde kúdiktiniń ústinen Qylmystyq kodekstiń 273-baby boıynsha («Daıyndalyp jatqan terrorızm aktisi týraly jalǵan habarlama berý») qylmystyq is qozǵalyp, sotqa deıingi tergeý amaldary júrgizilip jatyr. Qaırat Ábildınov. Derek: Qaraǵandy oblystyq ishki ishter departamentiniń baspasóz qyzmeti. Sýret: news.bigmir.net.