«Búgingi kúnniń Robın Gýdy» zań júzinde jazaǵa tartyldy

Qaraǵandyda bir urylar toby­nyń urlaǵan zattaryn balalar úıine tapsyrǵany týraly aqpar budan birqatar ýaqyt buryn tarap edi. «Baqsam, baqa eken» demek­shi, naǵyz kánigi úsh baýkespeden tu­ratyn qylmystyq topty Edýard Semın degen basqarypty. Ol buǵan deıin qaraqshylyq shabýyl ja­saǵany úshin túrmede jazasyn ótep kelgen basbuzardyń ózi eken. Al bostandyqqa shyqqannan keıin jas shamalary 18 ben 20-nyń aralyǵyndaǵy eki sybaılasty taýyp alyp, óziniń ejelgi isimen qaıta tabysqan. Qylmystyq top negizinen qala shetindegi garajdardy tonaýmen aı­nalysyp kelgen. Olar bul meken­derdiń esikterin buzyp kirip, ishindegi dúnıe-múliktiń birin de qaldyrmaı alyp ketip júripti. Birde olar jaıma bazardaǵy temir konteınerge túsip, quny shamamen alǵanda, 1 mıllıon teńge turatyn kıim-keshek pen aıaq kıimdi úptep ketedi. Taýardyń kóptigi sondaı, urylar ony qaıda aparyp qoıaryn bilmeı sasypty. Sodan oılana kelip, qoldy bolǵan taýardyń biraz bóligin balalar úıi­ne aparyp, tegin taratyp bergen. Jetimder úıinde olar ózderin qaıy­rymdylyq isimen aınalysyp júrgen kásipkerler retinde tanystyrypty. Alaıda, «qaıyrymdy jandar­dyń» kóp uzamaı arty ashylyp qa­lady. Jezqazǵan qalalyq soty top serkesin úsh jylǵa bas bostandy­ǵynan aıyrsa, janyndaǵy eki seri­gine eki jyldan jaza berdi. Qaırat ÁBILDINOV, «Egemen Qazaqstan». Qaraǵandy oblysy. Jezqazǵan qalasy.