Elbasy men el senimin aqtaıtynyn aıtty

Qazaqstan Prezıdentiniń Jarlyǵymen Altaı Kólginov Batys Qazaqstan oblysynyń ákimi bolyp taǵaıyndaldy. Aımaq aktıvine ony Premer-Mınıstr Kárim Másimov pen Prezıdent Ákimshiliginiń Basshysy Nurlan Nyǵmatýlın tanystyrdy. Ashyǵyn aıtqanda, jańa óńir basshysynyń esimi batys­qazaq­standyqtarǵa buǵan deıin de jaq­sy tanys deýge bolady. О́ıtkeni, ol óńirde oblys ákiminiń oryn­basary, Oral qalasynyń ákimi qyz­metterin adamdarmen or­taq til tabysa otyryp atqarǵan. So­nyń qaı-qaısysynda da ol ózine tap­syrylǵan iske jaýapker­shi­likpen qaraı bilgenine el-jurt kýá. Oblys aktıvi aldynda sóz alǵan A.S.Kólginov bul Elbasy men el tarapynan ózine kórsetilgen úlken senim men joǵary jaýap­ker­shilik ekenin aıta kelip, osy eki birliktiń údesinen shyǵýǵa, óziniń jastyq jigerin oblys ekonomı­kasyn odan ári kóterýge jumsaı­tynyn jetkizdi. Ári alda turǵan kúr­deli mindetterdi oblys jurtshy­lyǵymen jáne jańadan saılanǵan máslıhat depýtattary korpýsymen birlese otyryp atqarý ózi úshin úlken mereı ekenin aıtty. Sondaı-aq, aktıvte Úkimet basshysy K.Má­­si­mov ejelgi órkenıet óńiri atanǵan Aqjaıyq aımaǵyn tórt jyl­dan astam ýaqyt basqarǵan Nur­lan Noǵaevtyń atyna oń pikir bildirdi. Sonyń ishinde Premer-Mı­nıstr onyń oblysqa qajetti ın­ves­tısııalyq qarajat tarta bilý­degi erekshe eńbegine ekpin túsir­di. Álemde qalyptasyp otyr­ǵan bú­gingi kúrdeli qarjy-ekono­mı­kalyq jaǵdaılar men elimizde ón­diriletin shıkizattyq sektor baǵasynyń dúnıejúzilik rynokta tómendep ketýi jaǵdaıynda bul – atap aıtýǵa turarlyqtaı jaqsy qasıet. Investısııalyq tar­tym­dy­lyq qaı kezde de qajet, dep túıin­­dedi óz sózin Kárim Qajym­qanuly. О́z kezeginde Nurlan Noǵaev Oral óńirinde batys­qazaq­stan­dyq­tarmen qoıan-qoltyq, tize qo­syp eńbek etken kezeńi jadynda ǵu­myr boıy saqtalatynyn aıtyp, birlese atqarǵan nátıjeli is úshin aktıvke qatysýshylarǵa rıza­shylyǵyn jetkizdi. Temir QUSAIYN, «Egemen Qazaqstan». ORAL.