Arnaıy alleıa ashyldy

Táýelsizdik – eń ulyq mereke. Munyń qadirin jas urpaq jaqsy túsinedi. Bostandyq kilti ózge bireýdiń qolynda bolyp, moınyńnan buǵaý, aıaǵyńnan tusaý ketpegen jyldardyń qasiretin aǵa urpaq umytqan joq. Jumabek Táshenov sekildi eliniń baǵyna týǵan tulǵalar Qazaqstandy bodan memleket, qazaqty buratana halyq kórgen kompartııanyń basshysy N.S.Hrýshevqa qarsy shyǵyp, «qazaqtyń dalasy quraq kórpe emes, árkimge úlestirip bere beretin» dep ór keýdesin kerip, qasqaıyp turdy. Qyzmetinen aıyryldy, biraq ult namysyn taptatqan joq. Ulan-baıtaq bólshekteýden saqtap qaldy. Saqalyna shirkeı uıalap, aıaý­ly atamekenimizge jat aıaǵyn bas­qyzbaımyn dep at ústinde kes­kilesip ótken batyr babalardyń bir barmaǵy óle-ólgenshe tisteýli ótkeni anyq. Eli úshin aıanbaǵan er­lerdiń eskertkishi janynda jet­kin­shek­terge leksııa oqylyp, otan­súı­gishtikke tárbıeleý qolǵa alynsa eken dep oılaımyz. Myń márte qur­ǵaq aıtqannan bir ret óz kózi­men kórip, júrek eleginen ótkizgen artyq qoı. Túrkistan qalasyndaǵy gý­manıtarlyq kolledjdiń stý­dentteri men oqytýshylarynyń bas­tamasymen atalmysh oqý or­nynyń janynan «Qazaqstan Táýel­sizdigine – 25 jyl» alleıasy ashyl­­ǵanda da osyny oıladyq. Bul jıyn­ǵa myńǵa tarta stýdent jas­tar qatysty. «Jasyl el» baǵdarlamasy aıasynda 25 túp kóshet ekken jastar endi 25 túp alma, 25 túp shıe jáne 25 túp qylqan japyraqty daraq otyrǵyzýdy qolǵa alyp jatyr. Bos jatqan alańqaılarǵa gúlder egilýde.Qazaqstannan artyq Otan joq. Alýan ulttyń balasy osylaı deıdi. Basqa oqý oryndary men mekemeler de Táýelsizdik toıyna oraı túrli is-sharalar ótkizip, qurmetin bildirýde. Er túriktiń besigi Túrkistanda osyndaı ıgi ister qolǵa alynyp jatyr. Baqtııar TAIJAN, «Egemen Qazaqstan». Ońtústik Qazaqstan oblysy.