ASTANA. 16 sáýir. Búgin Qazaqstannyń birinshi demografy, belgili ǵalym Maqash Tátimov uzaqqa sozylǵan naýqastan keıin qaıtys boldy. Bul týraly Tengrinews.kz aqparyna súıengen egemen.kz tilshisi habarlady.
«16 sáýir kúni tańerteń Almatyda uzaqqa sozylǵan naýqastan keıin qazaqstandyq belgili ǵalym, etnograf, respýblıkanyń birinshi demografy, saıasattaný ǵylymdarynyń doktory, akademık Maqash Tátimov qaıtys boldy. Ol óziniń 76 jasqa tolýyna eki apta qalǵanda ómirden ótti», - delingen habarlamada. Qaıǵyly oqıǵanyń oryn alǵanyn marqumnyń uly Muhıt Tátimov rasqa shyǵarǵan.
Maqash Baıǵalıuly Tátimov 1940 jyly 30 sáýirde Almaty oblysy, Talǵar qalasynda týǵan. Ol V.I. Lenın atyndaǵy Máskeý pedagogıkalyq ýnıversıtetin (1966), Máskeý ekonomıkalyq statıstıka ınstıtýtynyń aspırantýrasyn (1969) bitirgen. 1970–1993 jyldary Qazaq KSR Ǵylym akademııasy Fılosofııa jáne quqyq ınstıtýtynyń ultaralyq qatynastardy zertteý ortalyǵynda kishi, aǵa jáne jetekshi ǵylymı qyzmetker bolyp istedi. 1931–1933 jyldary «goloshekındik genosıdtiń», 1937–1938 jyldary stalındik qýǵyn-súrginniń, ekinshi dúnıejúzilik soǵys maıdandarynda qaza tapqan qazaqtar shyǵynyn, totalıtarızm úshin «senimsiz» halyqtardyń Qazaqstanǵa qonys aýdarylýynyń saıası sebepterin ashyp kórsetý jónindegi túrli komıssııalardyń jumysyna, sondaı-aq 1986 jyly oqıǵaǵa qatysqan jastardy saıası-quqyqtyq aqtaý úderisine qatysty. Halyqaralyq statıstıka derekterine súıene otyryp, tuńǵysh ret dúnıe júzindegi túrki tildes halyqtardyń jalpy sanyn jarııalady.
1990 jyly «Azat» azamattyq qozǵalysyn qurýǵa qatysyp, onyń teń tóraǵasynyń biri bolyp saılandy. 1993–1996 jyldary Qazaqstan Respýblıkasynyń Prezıdenti apparatynda aqparat jáne taldaý bóliminiń aǵa sarapshysy qyzmetin atqardy. Tátimov kóshi-qon saıasatyn taldap jasaýshylardyń, shet jurttaǵy qazaqtardyń elge oralýyn alǵash uıymdastyrýshylardyń biri, Qazaqstan Respýblıkasynyń Prezıdenti janyndaǵy otbasy, áıelder jáne demografııa saıasat jónindegi sabaǵattyq keńestiń (1992–1997), adam quqyqtary jónindegi komıssııanyń (1992 jyldan) múshesi boldy.
1997 jyldan Ortalyq Azııa ýnıversıtetiniń rektory. «Qurmet» ordenimen, kóptegen medaldarmen marapattalǵan.
Marqumnyń janazasy dúısenbi, 18 sáýir kúni saǵat 11:00-de Ortalyq Azııa ýnıversıtetinde ótedi. Qonaq asysy «Almaty-Holl» (Abylaıhan – Jambyl kósheleriniń qıylysy) restoranynda saǵat 14:00-de beriledi.
Talǵat Raıymbek.
Derek, foto: egemen.kz.
