Qaraǵandy oblysynda úsh adam gazǵa ýlanyp qaıtys boldy

QARAǴANDY. 16 sáýir. Qaraǵandy oblysyndaǵy Iýjnyı eldi mekeninde úsh er adam jumys istemeı turǵan tazalaý qondyrǵysynyń qudyǵyna túsip, gazben ýlanyp qaıtys boldy. Bul týraly Qaraǵandy oblystyq tótenshe jaǵdaılar departamenttiń baspasóz qyzmetine silteme jasaǵan egemen.kz tilshisi habarlady. Iýjnyı eldi mekeniniń úsh turǵyny metall synyqtaryn jınaý úshin jumys istemeı turǵan tazalaý qondyrǵysynyń qudyǵyna túskende, ýly gazǵa tunshyǵyp, sol jerde jantásilim etken. Al marqumdarmen birge bolǵan 1972 jylǵy er adam aýrýhanaǵa jetkizildi. Oblystyq tótenshe jaǵdaılar jónindegi departamenttiń jedel-qutqarý otrıadynyń jaýyngerleri marqumdardyń denesin 5 metr tereńdikten tysqa alyp shyqty. Qazirgi ýaqytta qaıǵyly oqıǵa boıynsha tergeý-tekserý amaldary júrgizilýde. Qaırat Ábildınov. Derek, foto: Qaraǵandy oblystyq tótenshe jaǵdaılar jónindegi departament.