ASTANA. 18 sáýir. Ekvadorda joıqyn jer silkinisinen qaza tapqandar sany 272 adamǵa jetti. Sondaı-aq, 2 myńǵa jýyǵy túrli deńgeıde jaraqat aldy. Bul týraly TASS aqparat agenttigine silteme jasaǵan egemen.kz tilshisi habarlady.
«Resmı túrde opat bolǵandardyń sany 272 adam. Tabıǵat apatynan úlken shyǵyn keldi. Sońǵy 67 jyl ishinde elimizde mundaı jaǵdaı bolmaǵan edi. Degenmen zilzalanyń zardaby mamandardyń boljamyndaı aýqymdy bolmady», – deıdi memleket prezıdenti Rafael Korrea.
Qazir qutqarýshylar men órt sóndirýshiler qırandy astynda qalǵan turǵyndardy qutqarý jumystarymen aınalysýda. Aldyn ala málimet boıynsha, úgitindi astynda tiri qalǵandardyń sany kóbirek bolýy múmkin.
О́tken jeksenbi kúni el prezıdenti Manabı provınsııasyndaǵy Manta qalasyna kelgen. Dál osy aımaqta 16 sáýir kúni 7,8 balldyq jer silkinisi boldy. Bul qalada 1979 jyldan beri mundaı qýatty zilzala bolmaǵan. Tynyq muhıtynyń qasynda ornalasqan provınsııada tabıǵat apatynan úlken shyǵyn keldi. Kóptegen ǵımarattar, kópirler qırap, turǵyndar jaryqsyz, baılanyssyz qaldy. Ekvadorda Rafael Korreanyń nusqaýymen tótenshe jaǵdaı rejimi jarııalandy.
Mamandar magnıtýdasy 7,8 balldy quraǵan jer silkinisinen keıin taǵy da 180-nen astam dúmpý bolǵanyn málimdedi.
Aıan Ábdýálı.
Derek, foto: TASS.
