Sport – beıbitshilik elshisi

Almatyda BUU-nyń Qoǵamdyq aqparat departamenti men Qazaqstan Sport damý qorynyń birlesýimen Halyqaralyq sport kúnine arnalǵan merekelik shara uıymdastyryldy. Oǵan qaladaǵy tórt balalar úıiniń tárbıelenýshileri qatysyp, ózara baq synasty. Sport kúnin resmı merekeleý Qazaqstan Respýblıkasynyń Ánurany jáne Týyn kóterýmen bastaldy. Halyqaralyq Sport kúni ózara túsinistik pen toleranttyq atmos­ferany, beıbitshilik pen damýdy nyǵaıtýǵa yqpal etedi. Komandalyq rýh, adaldyq, tártip, qarsylasty qurmetteý sııaqty sporttyń ishki qundylyqtary búkil álemde oıyn erejeleri re­tinde qabyldanady jáne qoǵam­dyq, tatýlyq pen beıbit ómir súrýge yntymaqtastyrady. Mine, osyndaı maqsatta ótkizilgen ár­túrli sport jáne demalys is-sha­ra­syna Almaty oblystyq №1, Almaty qalasynyń №1, №2 jáne «Januıa» balalar úıleriniń 80-ge jýyq tárbıelenýshileri qa­tysyp, alǵashqy kómek kórsetý trenıngteri, fýtbol boıynsha týrnır, kóńildi estafeta, bıshiler men ánshiler kórsetilimderi, sondaı-aq zýmba áserli bıi men brazılııalyq kapoeıra jaýyngerlik óneri kór­setildi. Is-sharanyń ashylý saltanatynda BUU-nyń Aqparattyq bıýrosy, IýNESKO, Qazaqstan Sport damý qorynyń ókilderi qatysýshylardy quttyqtap, kishkene sportshylarǵa jarysta sáttilik tiledi. Shaqyrylǵan is-shara qona­ǵy Zumba fıtnes bıi jat­tyq­tyrýshysy jarys bastal­ǵanǵa deıin balalardy bıletip, fýtbol týrnıri jáne estafetalarǵa qatysýyna kúsh-jiger berse, Qazaq­stannyń Qyzyl Aı qoǵa­mynyń jat­tyqtyrýshylary olarǵa alǵashqy medısınalyq kó­mek erejelerin kórsetti. J­a­rys aıaqtalǵan soń balalar «M­anej» kesheni janynda orna­lasqan «Qaırat» sport barynda tamaqtandy. Sonan soń QMEBI ýnıversıteti stýdentteri jáne kapo­eırıster ónerlerin kór­setip, artynsha marapattaý rásimi ótti. Sonymen, jarysta Al­maty qalalyq №2 balalar úıiniń fýtbol komandasy jeńiske ıe boldy. Al is-sharanyń demeýshileri men seriktesteri, atap aıtqanda, IýNESKO-nyń Klasterlik bıýrosy, BUU Halyqtyń qonystaný damý qory, Qazaqstannyń Qyzyl Aı qoǵamy men Fitness Line, Kind Burger, ToiMart, UDprint, Almaty Mall, Raimbek bottlers kompanııalary árbir qatysýshy balaqaıǵa sertıfıkat berip, syılyqtar tabys etti. Gúlzeınep SÁDIRQYZY, «Egemen Qazaqstan»